Durante e tratamento di presupuesto 2026 di diferente entidad, Parlamentario di AVP y lider di fraccion, Sra. Jennifer Arends-Reyes, a tuma nota di un preocupacion serio: e scarsedad continuo di personal cualifica den e sector publico, particularmente den e instancianan conoci como Hoog Colleges van Staat – e Algemene Rekenkamer, Raad van Advies y Parlamento mes.
Segun Sra. Arends-Reyes, hopi di e vacaturanan den e institucionnan crucial aki ta keda habri pa un periodo largo. Esaki ta trata di posicionnan cu ta rekeri un nivel halto di capacidad, experiencia y profesionalismo, cu no solamente ta importante, pero absolutamente esencial pa garantisa un estado democratico fuerte y transparente.
“Nos ta papia di organismonan cu tin un rol crucial den e funcionamento di un democracia saludabel, transparencia financiero y bon gobernacion. Sin personal suficiente y prepara, esey ta compromete e independencia y e eficiencia di nan trabou,” segun e parlamentario.
Den e cuadro di e preocupacion aki, Sra. Arends-Reyes ta urgi gobierno pa duna prioridad inmediato na un plan di fortalecemente laboral pa sector publico. E puntonan principal ta inclui:
• Atrae y retene talento local y di e region;
• Inverti den formacion y capacitacion di empleadonan publico;
• Modernisa e proceso di reclutamiento pa yega mas eficazmente na e profesionalnan cu Aruba mester pa un funcionamiento optimo di su democracia.
Sra. Arends-Reyes enfatisa cu e problema no ta solamente un reto financiero of presupuestario, sino un cu ta afecta directamente e fundeshi di nos sistema democratico.
“Nos no por sigui laga e institucionan di mas importante pa control y asesoramiento keda sin suficiente personal. Esaki no ta solamente un asunto di presupuesto, sino di garantia di nos democracia y bienestar di e pais,” Arends-Reyes a conclui.
E lider di fraccion a reafirma tambe cu durante tur tratamento di presupuesto venidero, e lo sigui pone enfasis riba e tema crucial aki, pa asina stimula un accion concreto.
