Y cu hopi gradicimento na nos curason pa e dushi yobidanan di e ultimo dianan aki, nos tey bek cu nos relato, despues di tawatatin un siman hopi ocupa y activo. Hopi a hanja falta di nos relato siman pasa, nos ta aprecia tur e bon comentarionan. Dushi ora awa yobe noh ? Lady Ruth no ta comprende cu tin hende ta keha y keha so ora awa ta yobe. Ta bunita con nos naturalesa ta cuminsa luci y briya mas den nan trahenan berde berde. Nos dushi hendenan cu ta planta den nan hardin of riba nan pida tereno, den cunucu, ta hopi pero hopi felis mes ! Nos no por hanja exactamente locual nos kier na midi y cantidad di awa diario, pero ta accepta brasa habri locual Papa Dios manda nos di ariba.
Pa esnan pendiente di nos” Hoorzitting”, nos no a tende nada fey di e Klachtencommissie di HOH ainda ni di IVA, aunke ya ta 6 siman. Podise nan mester di mas tempo pa sigui cu nan onderzoek ? Aunke nan tin tur info caba den nan rapportnan riba piso 2 di Tower A ? Asina dificil pa check e rapportnan di e siman 30 sept pa 7 di Oktober 2025 ? Asina mes cu ta tur ta pasa oranan sinta tras di laptop pa relata con nan dia a bay ? Nos tambe a lesa un relato sumamente importante di OPPA encuanto con e cantidad di nos grandinan cu a y ta fayece ultimamente ta subiendo drasticamente of a subi drasticamente.
“Aumento alarmante den fayecimento di Adultonan Mayor merece un investigacion serio” ta e titiulo di nan relato ,cu sigur ta afirma hopi di nos cu tin fayonan y of negligencia den cuido pa cu nos adultonan mayor. Y ketobay, unda Lady Ruth bay, ta topa cu un of mas persona cu ta comparti nan testimonio di locual a pasa cu nan tata of nan mama grandi di edad. Hopi tristo !
Nos no por hinka man den candela pa niun den cuido pa cu nos grandinan, ni pa enfermeronan ni pa dokter of specialistanan, pero, cu pruebanan cu locual a pasa cu mi Mama, awe dfm, mi mester a sali padilanti cu mi keho na HOH pa nan por “purba” di evita cosnan asina cu otro grandinan, pa nan trata otro manera nan kier wordo trata. Nos tur ta spera di bira grandi un dia den bon salud of cu bon cuido. Corda tin algo cu yama Karma. Of crioyamente bisa :” Bo ta cosecha locual bo ta sembra”. Bon ta atrae bon bek pabo, y malo cu bo hasi ta atrae malo bek pa bo. Con por ta cu dokter of specialista ta depende 100 % riba enfermeronan y no ta bin wak e patient y ni bin papia cu famia ? Dal e grito eyfonan : Tur hende cu tin un crenchi bon memoria por bira dokter y prescribi receta cu ayudo awendia di AI , bo no tin mester di tin un bon curason mas y ni scucha e “yamada” den bo curason ? Bo no ta bin wak e estado di e patient pero ta sigui duna ordo numa pa dune mas infuus y mas glucose, bahele atrobe y despues subiele atrobe , bolbe bahe, ach, asina unprofesional, asina sin sinti, sin gevoel . Tin ta puntrami si ta bale la pena bringa pa un carta, un pida papel den cual por ta nan no ni apologize y pidi sorry bisa cu ta duel nan locual a pasa y solamente describi “nan” version di locual a of por a sosode den cuido di e patient, mi mama. Pero, nos lo comparti cu mi pueblo ora ta sina lew. Mientrastanto nos ta sigui padilanti cu nos bida familiar, adaptando y acceptando cu lo ta nos prome Pascu y cambio di anja sin nos dushi mayornan fisicamente. Nan ta awor mas serca di nos curason sigur .
Shonnan, si boso por, atende un of otro actividad di Pascu of di fin di anja cu famia, tin algun bunita conciertonan na caminda den Theresita Center San Nicolas of BNA. Bishita Flora Market disfruta y sinti e dushi ambiente den nan bunita decoracion. Cumpra un oliebol na Superfood .
Pero mas cu tur, prepara bo curason pa ricibi, reconfirma e baby Hesus den bo bida. Ta esey ta e berdadero lus di Pascu cu ta dunabo paz, amor y alegria . Danki pa lesa nos relato cu atencion y curason. Pasa un dushi dia yen di sabiduria den nos alegria ! Un “bearhug” pa boso tur !
