Gobierno di AVP FUTURO despues di hopi luna, porfin a traha riba e cambio di Ley di Landsverordening Instelling Ministeries (LIM) y poco dia pasa Parlamento a haya e Ley di LIM hunto cu e conseho di Raad van Advies riba esaki. En corto por bisa cu Raad van Advies a haci “korte metten” cu e manera cu AVP FUTURO a organisa e ministerionan den e Ley di LIM. Segun e organo di conseho, AVP FUTURO su organisacion di ministerionan no tin logica y ta pone Aruba na peliger.
Ministerio di KOJIS ta mas ilogico cu tur
Segun Raad van Advies e ministerio cu mas falta di logica den combinacion di cartera, ta e Ministerio di Relacion di Reino, Enseñansa, Hobennan, Innovacion y Deporte di Minister Gerlien Croes, Ministerio di KOJIS.
Cinco cartera den un solo man ta faya
Pone cinco ministerio den man di un solo Minister, esey segun Raad van Advies ta un experimento cu futuro di Pueblo cu ta receta pa fayo. E carteranan no tin relacion cu otro y cada cartera riba su mes ta exigi hopi atencion di e Minister y su ekipo. Door di pone nan hunto, e focus ta bay perdi, y e trabou ta bay keda mitar haci, perhudicando Pueblo.
Ta debilita Aruba den Reino Hulandes
Raad van Advies ta splica cu Relacion di Reino ta algo sensitivo y strategico, y door di combina esaki cu Enseñansa, Hobennan, Innovacion y Deporte, esaki ta debilita Aruba su posicion den Reino Hulandes. Relacion di Reino ta un cartera cu semper a wordo atendi pa Minister President cu ta na cabes di e gabinete, pero den gobernacion di AVP FUTURO pa capricho di Gerlien mas sigur, awo ta combina Relacion di Reino cu cuater otro cartera cu lo kita e atencion y diplomacia necesario pa defende Aruba su interesnan den Reino Hulandes.
A traha forti di poder politico sin logica y cu riesgo
Parlamentario Xiomara Maduro ta lamenta cu AVP FUTURO ta sinta haci wega politico cu cosnan serio. E organisacion di e ministerionan di Gabinete AVP FUTURO mester wordo haci na un manera efectivo pa sirbi interes di Pueblo. Locual cu tin awo, sigur pa locual ta trata ministerio di KOJIS di Minister Gerlien Croes, ta crea un forti di poder politico, cu no tin logica y cu ta pone bienestar di Aruba na riesgo. Ta di spera cu AVP FUTURO su Parlamentarionan tambe realisa cu tipo di forti politico asina ta iresponsabel y ta perhudica Pueblo, y pesey nan no por laga Minister Gerlien keda haci deshaci.
