Dia 1 di december 2025 ta un dia historico pa Aruba, cu apertura di oficina di Ombudsman. Ombudsman, defensor di pueblo, ta asisti tur ciudadano cu tin un keho riba un trato inapropia.
“Desde e prome dia den mi gobierno, nos a pone prioridad na esaki. No tabata facil, pero nos a logra.
A apunta un kwartiermaker, sra. Sahaira Kelly, cu a cuminsa cu e preparacionnan. Nos a institui un comision Versterking Democratisch Bestel pa asisti den e aspectonan huridico. Presidente di Parlamento e tempo ey sr. Edgard Vrolijk a hunga un papel crucial den lidera e proyecto di ley. Asina e creacion di e Ombudsman a cuminsa.
Na caminda nos gobierno a purba ancra e Ombudsman den nos Constitucion, pero oposicion e tempo ey, AVP, MAS y Accion 21, tabata contra. Mirando cu pa cambia nos Constitucion mester di por lo menos 2/3 parti di voto, pues 14 voto, y oposicion no kier a coopera, e cambio di Constitucion no a tuma lugar.
Sinembargo esey no a stroba nos gobierno y nos a haci e ultimo cambionan den ley pa por continua.
E ultimo parti tabata e seleccion di e candidato pa Ombudsman y cu hopi orguyo dia 1 di oktober 2024 sra. Jurima Bryson a wordo nombra. Sra. Bryson tabata encarga pa selecciona e personal di e Bureau Ombudsman.
Diabierna ultimo mi tabata tin e honor di bishita e oficinanan y sera conoci cu e personal.
Mi ta extremadamente orguyoso di nos Bureau Ombudsman. Mi ta sigur cu Ombudsman lo ta un bon ayudo pa comunidad en general. Mi ta desea sra. Jurima Bryson y henter e equipo di Bureau Ombudsman hopi éxito” Parlamentario Evelyn Wever-Croes a expresa.
