Caya Grandi for di tempran a sinti e acogida grandi cu e comunidad a duna cu e actividad di Ban Bek Caya. Comerciantenan a prepara cu descuento/ofertanan fabuloso pa asina brinda e pueblo un bon experiencia di compras.
Por a mira cada tienda yen di cliente cu a bin pa haci compra y probecha di cada oferta. For di momento cu a mira e trafico den cercania di Caya Grandi cuminsa pega, por a premira cu e diabierna di Black Friday lo a bira un exito rotundo.
Hopi ta esnan cu enberdad a presenta hopi mas tempran cu custumber y a shop na smaak te den ora laat di anochi. Cada tienda tabata un placer di por a drenta y haya e servicio amabel cu nan a ofrece.
Hopi cara contento cerca e comerciantenan, cu a expresa nan sosten y gratitud pa tur e esfuerso cu hunto ta haciendo pa rebiba Caya Grandi. Gobierno di su banda ta keda empuha mas cu por e actividad di Ban Bek Caya pa asina garantisa cu comercio ta haya e chens di para bek riba su pia.
Ambiente di entretenimento no a keda falta, na cada skina por a topa cu diferente kiosko y banda musical pa tene e energia halto. Famia completo a gosa di un tremendo actividad, pero mas cu tur cos, comercio a haya un bon boost y e comunidad a haya bon descuento riba nan compras.
E siguiente Ban Bek Caya ta 19 di december, Ban sigui sostene!
