Aruba Conservation Foundation (ACF), como un organisacion independiente dedica na maneho di conservacion, ta contento di por a ricibi e team di Toledo Zoo unabes mas na Aruba. Pa hopi decada, ACF a traha hunto cu specialistanan di Eckerd College di Florida y Toledo Zoo di Ohio den un colaboracion cientifico pa monitorea e populacion di Cascabel (Crotalus unicolor) – un di e colebranan mas unico na mundo y e unico ‘rattlesnake’ cu ta existi exclusivamente na Aruba.
Durante e bishita na october di e aña aki, e team dirigi pa Dr. Matt Cross, hunto cu Conservation Rangers di ACF, a haci sondeo den seis diferente area na Aruba conoci como habitat di e Cascabel. E team a logra identifica Cascabel nobo y tambe a encontra cascabel cu anteriormente a ricibi chip caba, loke ta duna un bista importante riba e movecion, comportacion y estado di e populacion.
Den luna di December ACF ta yama bon bini unabes mas na Dr. Jeff Goessling di Eckerd College kende tin decadas ta asisti Aruba cu su conocemento y experiencia pa loke ta cascabel pero tambe e famoso cododo y boa. Dr. Goessling lo agrega mas muestra na e set di data genetico pa asina por evalua e tamaño di e populacion efectivamente y tambe test con bareranan natural of traha pa hende ta impacta e distribuicion di Cascabel pa na Aruba.
E Cascabel ta un especie endemico y tin un rol esencial den mantene e balans di nos sistema ecologico. Estudio a mustra cu nan presa principal ta inclui lagadishi, raton di cas, y coneu chikito ‘Arubian Cottontail’, pues e Cascabel ta yuda controla tambe populacion di entre otro bestianan manera raton y djaca y ta sostene un medio ambiente saludabel.
ACF ta remarca cu e Cascabel ta proteha bou di e Ley Bescherming Inheemse Flora & Fauna, y abuso of matamentodi e Cascabel ta contra di ley. Su existencia ta wordo menasa principalmente pa perdida di habitat, animal domestica manera cacho y pushi, y presion humano riba e tereno.
Yamada na comunidad di Aruba
Den cuadro di e estudio riba e poblacion di e Cascabel, investigadonan di ACF, Toledo Zoo y Eckerd College ta colaborando pa documenta observacionnan di e especie. ACF ta haci un yamada na comunidad pa contribui na esfuersonan di ciencia comunitario door di raporta si mira un Cascabel, sea den naturalesa of den areanan mas urbano. Por haci esaki via e siguiente link https://arcg.is/0OPqmX0 . E data colecta lo yuda pa determina e distribucion y frecuencia di e Cascabel endemico, y lo sirbi como base pa diseña medidanan di conservacion mas efectivo.
E colaboracion entre ACF, Toledo Zoo y Eckerd College ta demostra e importancia di cooperacion internacional y compromiso local pa asegura cu e unico ‘rattlesnake’ di Aruba por keda proteha pa mas decadas. Si acaso encontra un Cascabel of cualkier especie protegi por manda un mensahe via Whatsapp na e Wildlife Hotline di ACF na 592-4476.
Anochi Informativo
Pa esnan cu kier siña mas, ACF lo ta organisando Naturalesa ta Papia riba Aruba su Cascabel hunto cu Dr. Jeff Goessling kende lo ta na Aruba pa elabora riba riba e proyecto di Monitoreo di e Cascabel. E dianan ta lo siguiente:
- 10 december: Centro di Bario Dakota, 6:30pm – 8:30pm
- 12 december: Centro di Bario Playa Pabou,6:45pm – 8:45pm
Pa mas informacion por tuma contacto cu Aruba Conservation Foundation na info@acf.aw of por bishita paginanan social Facebook of Instagram.
