E piloto di e avion priva cu minister Gerlien Croes a usa pa bay Curacao dia 19 di november 2025 ta lanta preocupacion nobo, despues cu e propio minister a declara publicamente cu e vuelo a wordo paga di su propio saco.
E problema?
Informacion preliminar ta indica cu e jet priva cu a transporta minister aparentemente no tin licencia pa cobra pasahero, ni pa opera como charter comercial. Si esey ta corecto, ningun tipo di pago, ni pa asiento, ni pa gasto, tabata permiti.
Esaki ta pone e piloto i e operador den un situacion delicado. Si autoridad merikano haya informacion contradictorio di loke e minister a bisa i cu e avion no ta autorisa pa hasi, por sigui sanccion de inmediato, cu por trece consequencia finansiero i operativo grandi pa tur parti envolvi.
Te cu awe Gerlien ta den silencio: Kico su silencio ta nifica? Ta un error simpel of tin un parti di e historia cu no kier sali papia?
Si Gerlien perhudica su mes politicamente, esaki ta parti di responsabilidad den un cargo publico. Pero si e declaracion ta pone un piloto priva na riesgo di boet grandi o problema legal, esaki ta bai un paso mas leu, un paso cu por afecta bida profesional di un hende cu no ta tin nada di haber cu politica.
Solo di Pueblo lo sigui exigi transparensia te ora tur punto ta cla.
