Minister di Finansa, Asunto Economico y Sector Primario, mr. Geoffrey Wever ta expresa su mas profundo agradecemento na señor Herrick Henriquez, despues cu e a completa su periodo como presidente di Aruba Trade & Industry Association (ATIA). E periodo di señor Henriquez den e organisacion ta caracterisa pa un liderazgo firme, entrega constante, y un vision claro pa fortalece e sector empresarial di Aruba den un tempo crucial pa nos economia.
Durante su presidencia, señor Henriquez a guia ATIA den un fase cu a conoce hopi desafio, marca pa retonan economico y social despues di pandemia. E a sa di mantene un dialogo constante cu empresanan di diferente tamaño y sector, a duna direccion den adaptacion tecnologico, y a promove reconstruccion gradual di operacion y modelo di negoshi, pa asina proteha stabilidad y stimula un recupracion duradero. Esaki a fortifica e papel di ATIA como bos principal di sector empresarial y como partner indispensabel den discusionnan clave cu Gobierno di Aruba y otro instancianan relevante.
Den un periodo unda Aruba tabata enfrenta condicionnan instabiel y presion financiero, señor Henriquez a fortalece advocacion pa reformanan structural riba tereno di impuesto, legislacion laboral, eficiencia administrativo y competitividad. Cu consistencia y claridad, e a enfatisa necesidad pa un fundamento economico mas agil, transparente y orienta riba crecemento, reconociendo cu un cuadro regulatorio modernisa ta esencial pa un economia mas resiliente. Su liderazgo a contribui pa drecha un caminda unda sector empresarial por opera cu mas certesa, direccion y vision di futuro.
Un otro area importante di su aporte tabata su enfoke riba formacion profesional y desaroyo di talento local. Durante su presidencia, ATIA a amplia actividadnan di capacitacion riba tereno financiero, maneho di recurso humano, proceso di aduana y otro conocemento relevante pa fortalece profesionalismo den sector empresarial. E iniciativa aki a contribui directamente na un comunidad empresarial mas prepara y mas resistente, cu por mantene su lugar firme den un economia global cu ta den movecion constante.
Na mesun momento, señor Henriquez a duna un empuhe renoba na cultura di liderazgo y emprendemento. Evento y plataforma formativo den cuadro di ATIA, incluyendo e conferencianan dedica na liderazgo y crecemento personal, a inspira un generacion nobo di profesional y empresario cu ta busca pa agrega balor na nos economia. E enfoke den desaroyo humano y innovacion a reafirma ATIA como un motor central den progreso y renobacion economico.
Durante su periodo, señor Henriquez tambe a amplia relacionnan regional y internacional di ATIA, posicionando Aruba mas fuerte den un red empresarial mas amplio. E vision pa consolida ATIA como un puente cu ta conecta Aruba cu mercado y organisacion den region y mas aya, ta forma parti di un aspiracion nacional mas amplio pa diversifica y fortalece nos plataforma economico.
Ministerio Geoffrey Wever ta expresa su reconocemento pa e liderazgo, integridad y dedicacion di señor Henriquez durante su periodo na ATIA. Su trabou ta keda caracterisa pa claridad di proposito, firmesa den momentonan dificil y un compromiso profundo cu cooperacion y progreso nacional. E legado cu e ta laga ta sirbi como inspiracion pa sector empresarial y pa e relacion continuo entre sector publico y sector priva.
“Liderazgo di señor Henriquez na ATIA a fortalece e bos di sector empresarial y a contribui directamente na un direccion economico mas resiliente y orienta riba futuro pa Aruba. Na nomber di Gobierno di Aruba, mi ta expresa un aprecio y gratitud profundo pa su entrega, su profesionalismo y su aporte valioso na nos pais,” Minister Geoffrey Wever a conclui.
