Den un atmosfera di orguyo y alegria, mas di 40 cursista a culmina exitosamente e curso di Supervisor Management 1 y 2, un programa crucial ofreci pa Enseñansa pa Empleo (EPE) cu ta conecta siñamento cu oportunidad real den mercado laboral.
Durante e ceremonia di graduacion, Minister di Relacionnan den Reino, Educacion, Hubentud, Inovacion y Deporte, mr. Gerlien Croes, tabata presente pa entrega personalmente e certificado na cada cursista cu a completa esaki cu exito, acompaña pa docente y personal di Enseñansa pa Empleo. Den su discurso, e minister a destaca e balornan di superacion personal y formacion continuo como fundamento pa un futuro mas fuerte.
E programa di Supervisor Management ta diseña pa amplia habilidadnan den liderazgo, maneho di personal y operacion, hopi esencial pa esnan cu ta busca avance den nan rol profesional. E iniciativa aki ta mustra e compromiso continuo di Aruba pa promove desaroyo humano y prepara mas hende pa contribui den un economia creciente.
Minister Gerlien Croes a felicita tur graduado pa nan esfuerso y perseverancia:
“Pabien di curason! Sigui crece, sigui siña, y sigui inspira otro cu bo ehempel. Aruba ta depende di hende cu tin determinacion manera boso pa sigui hiba nos pais dilanti.”
E ministerio lo percura pa continuacion di programanan cu ta habri porta pa hoben, adulto y profesionalnan cu ta busca direccion nobo of kier amplia conocemento den nan bida. Enseñansa pa Empleo ta reafirma cu siñamento ta un proceso cu no tin final, y cu e boluntad pa supera mes ta e forsa cu ta crea transformacion real.
Minister Gerlien Croes tambe a expresa su gratitud na e personal dedica di Enseñansa pa Empleo y na docente Ernst Mohammed, cu su guia y entrega a contribui directamente na exito di cada cursista.
