Parlamento a trata e landsverordening Instelling Ministeries, LIM, den cual ta reparti e carteranan den e ministerionan, cu ta e resultado di negociacion di formacion. A tarda masha hopi mes pa yega asina leu, pero porfin el a yega.
“E ambiente den sala no tabata di hubilo manera bo lo a spera, tabata mas bien manera un belorio. Y claro, cu rason, pasobra e ley cu a bin cu conseho masha negativo di Raad van Advies, un dictum 4, cu ta compara cu un ‘diepe onvoldoende’. Si ta un punto riba rapport, e lo ta entre un 2 y 3.
Locual mas mi ta lamenta, ta con e vice presidente di Parlamento, sra. Muzanin Wever, a trata di tur forma pa nos fraccion no haci pregunta na gobierno riba e ley. Pero ey el’a dal su dede pasobra nos a entrega keho contra dj’e, y e mester a duna nos e posibilidad di haci pregunta”, lider di Fraccion Evelyn Wever-Croes a duna di conoce.
Locual cu mas a resalta di e ley aki, ta e reparticion desbalansa y hopi bruha. Un Minister President cu un ministerio hopi bashi, y otro ministernan cu hopi mas peso. Ta manera cu AVP no tabata kier ningun responsabilidad, y kier a duna Futuro mayoria di responsabilidad, of ta pasobra Futuro a exigi tur esaki.
Hopi hende ta puntra nan mes ta kico a pasa cu e partido AVP cu nos tabata conoce? Esaki ta un AVP hopi debilita. AVP y Futuro den Parlamento a aproba e ley aki na fin di e reunion.
