Durante sesion di parlamento, parlamentario di AVP, Dennerich Kelly, a presenta su disertacion riba e Landsverordening Instelling Ministeries 2025–2029 (LIM), un ley di peso cu ta defini con nos pais ta wordo goberna y con responsabilidadnan ta reparti den gobierno.
Segun Kelly, ta normal y saludabel cu oposicion y Raad van Advies a mustra nan preocupacion riba e ley. “Esaki ta parti di un democracia sano. Pero ta importante pa pueblo sa cu gobierno AVP–Futuro no a presenta un ley sin base,” el a enfatisa. E LIM a sigui su trayecto constitucional completo: via gobernador, cu conseho di Raad van Advies, y finalmente yega parlamento pa wordo trata. Esaki ta mustra cu e ley tin suficiente base huridico pa discuti cu seriedad.
Gobierno AVP–Futuro a mustra apertura y disposicion pa mehora. A base di e consehonan ricibi, a haci varios adaptacion: A elimina articulo 8, a clarifica articulo 9, a presenta un nota di cambio y parlamento a haya un splicacion cla riba e estructura di ministerionan. “Esaki no ta arogancia, sino apertura. E ta prueba di disponibilidad pa ajusta, no rigidez, teniendo pueblo prome na tur momento” Kelly a declara.
E LIM no ta perfecto, pero ta un punto di salida moderno, adapta na e realidad actual di Aruba. Segun Kelly, e ley ta yuda parlamento cumpli miho cu su rol di control, manteniendo gobierno skerpi y responsabel.
El a recorda cu, prome, durante y despues di campaña, AVP a keda den dialogo constante cu pueblo. Awe Aruba tin un gobierno cu un mandato cla, cu ta refleha e puntonan di dolor comparti den comunidad. E LIM ta refleha con gobierno AVP–Futuro lo implementa su programa di gobernacion.
Parlamentarionan di AVP lo sigui eherce nan trabou cu calma, responsabilidad y respet pa nos institucionnan. “Un pais no ta crece riba miedo, pero riba confianza, stabilidad y bon gobernacion,” Kelly a expresa. Segun e, Aruba no mester di panico institucional, sino siguridad institucional.
AVP ta keda fiel na un politica cu ta scucha pueblo, cu ta dialoga y cu ta traha pa un Aruba mas fuerte, mas stabil y mas sigur pa tur ciudadano.
