Durante e debate publico riba e Tweede Suppletoire Begroting 2025, lider di fraccion di AVP den Parlamento, Sra. Jennifer Arends-Reyes, a presenta un evaluacion cla, constructivo y orienta riba solucion, reconociendo e señalnan positivo di recuperacion economico y e esfuerzonan continuo pa garantisa bienestar pa pueblo Arubiano.
Segun Arends-Reyes, Aruba ta drenta un fase nobo despues di e impacto profundo di pandemia. “Nos ta mira cu un maneho fiscal mas cuida, combina cu inversionnan strategico, ta crea un base mas fuerte pa un economia stabiel y mas resiliente,” e lider di fraccion a declara. E Tweede Suppletoire Begroting ta confirma cu gobierno ta tuma decisionnan responsabel, sin perde di bista e nesesidadnan social di comunidad.
Fraccion di AVP ta destaca cu e aumento den entrada nacional, principalmente danki na sector di turismo y un recaudacion fiscal mas eficiente, ta un señal claro cu confianza den economia ta bolbe crece. Simultaneamente, e maneho di gasto publico ta mas disciplina, cu enfoke riba prioridadnan cu tin impacto directo riba calidad di bida.
Sra. Arends-Reyes a felicita gobierno pa sigui inverti den bienestar social, cu fondo adicional pa enseñanza, salud y apoyo na famianan vulnerabel. “Esaki ta mustra cu crecemento economico no ta un obhetivo riba su mes, pero un medio pa crea mas oportunidad y proteccion pa nos pueblo,” el a enfatisa.
Ademas, fraccion di AVP ta resalta e importancia di inversion continuo den infrastructura, energia renovabel y sosten na negoshinan chikito y mediano. Segun Arends-Reyes, esaki ta elemento clave pa diversifica e base economico di Aruba y pa crea empleo sostenibel pa presente y futuro.
Fraccion di AVP ta considera e Tweede Suppletoire Begroting 2025 como un paso positivo riba e caminda di estabilidad fiscal, crecemento responsabel y bienestar social. AVP lo sigui eherce su rol di control cu seriedad y cooperacion, cu e meta pa contribui na un Aruba mas fuerte, mas stabiel y cu mas perspectiva pa tur ciudadano.
