Hopi biaha ora un hende ta kere cu si e sera su curason pa otro hende, y por ehempel, no ta papia , no ta cuminda, pero si ta pleita constantemente, sigi insulta, rebaha y calumnia, esey ta haci un persona sinti su mes duro, pero alcontrario e ta demostra cu bo ta zwak y bo mente ta tormenta.
Falta di pordon ta un arma diabolico, cu ta permiti e diabel di tin derechi legal pa tormenta nos bida, pasobra nos ta den desobedencia na Dios.
Falta di pordon por ocaciona y ta ocaciona hopi division den famia, y hopi hende amarga cu ta cana rond y intoxica otro.
Falta di pordon ta stroba nos contacto cu Dios, y tambe ta trece trastorno mental, y pa esey no tin remedi. Pasobra e asunto ta spiritual, y sin confesion e mente no tin pas.
Den Mateo 18:23-35 ta para scirbi kico Dios ta haci cu esnan cu no ta pordona di Curason, especialmente esnan cu ta haci wega cu Dios su palabra, y no kier duna otro chens den bida.
Falta di pordon no ta haci nada mas cu destrui personalidad di hende, pasobra hopi biaha bo ta kere cu e razon cu bo tin ta duna bo derechi di no pordona, caba ta bo bida ta wordo tormenta constantemente.
E problema di Salud Mental ta grandi, pero e problema di falta di pordon ta mas grandi ainda, ya cu falta di pordon ta un destruidor silencioso.
E ta drenta cu palabra y cu hecho, pero e ta manifesta su mes den stress, depresion, preocupacion, amargura, malesa y ansiedad, y mas tanto un hende tarda pa pordona mas vulnerabel e ta pa malesa tanto mental como fisico.
No laga nada ni ningun hende kita bo pas, pasobra e palabra di Dios ta bisa hopi cla den Hebreonan 12:14 : Aspira pa tin pas cu tur hende,y santificacion, sin cual ningun hende lo no mira Dios.
Stop di biba buscando otro pa destrui, stop di biba bao di mantel di envidia y arogancia, pasobra nos tur tin cu pordona manera Dios a pordona nos, pasobra asina nos ta obedece palabra di Dios.
Ma ken cu boso pordona algo, mi tambe ta pordona,pasobra di berdad loke mi a pordona, si mi a pordona algo, mi a hacie pa boso motibo den e presencia di Cristo. Pa Satanas no cohe bentaha riba nos, pasobra su trikinan no ta desconoci pa nos.( 2 Corintionan 2:10-11).
Falta di pordon den un matrmionio, ta bay tumbando e hogar poco poco te yega na suela,pasobra pa motibo di falta di pordon entre mayor, educacion di yiunan ta stanca, pasobra e mayornan no por duna ehempel cu nan bida, pasaobra e mihor manera pa educa nos yuinan ta cu nos cu ta den boluntad di Dios.
Laga nos evita tur manera pa nos stop di insulta otro pasobra e palabra di Dios ta bisa; no laga ningun palabra danino sali for di boso boca,sino solamente palabra cu ta bon pa edificacion. Conforme e necsidad di e momento, pa esaki por duna gracia na esnan cu ta tende. ( Efesionan 4:32).
No laga falta di pordon ta reina den bo cas, duna e hempel di pordon como mayor, pa asina e muchanan tin un modelo pa wak riba dje,un bon ehempel pa sigi, pasobra nos ta bibando den tempo trabahoso, caminda comportacion di hende ta cambia.
Nos adversario e diabel ta cana rond manera un leon cu ta grunja, buscando ken e por devora.
Caminda tin falta di pordon y amargura eynan e ta keda staciona y tormenta.
Sinceramente, Pastor Marcel Balootje
