Despues di algun siman di preparacion intensivo, Porta pa Harmonia ta den fase final pa su presentacion na publico pa locual ta trata e tayer di Dande cu nan a efectua. Esaki tabata nan prome tayer cu a brinda e oportunidad na tur hoben cu ta desea di explora nan talento den musica.
Albertico ‘Tico’ Kelly, docente violin, mandolin y baho den Arubaanse Muziek School tambe a brinda su aporte na e tayer di Dande cu a tuma luga den Semeleerstraat na Noord, den Porta di Harmonia.
Dande ta un interpretacion cu por varia entre esun cu ta presente, Tico ta di pensamento cu Dande ta un bendicion cu ta ser canta y asina expresa e bon deseo na tur cu ricibi esaki durante e cambio di aña, pa ricibi e aña nobo yen di bendicion.
Mirando cu e Dande ta pasa di cas pa cas, esaki tin como intencion su tras pa desea e hendenan di cas tur clase di bendicion pa e aña nobo cu a caba di drenta.
E tayer di Dande a bin cu e meta di lanta interes di e hobennan pa e Dande, pa asina engrandece e celebracion cultural y pasa e Dande di un generacion pa e otro. Di gran importancia pa mantene e tradicion aki bibo, como cu esaki ta un/ of e unico cantica folklorico di Aruba.
Raquel Lampe, docente di Arte y Cultura tambe ta forma e team di tayer di Dande a duna su bista riba e importancia di inculca, for di edad hoben, e balor inmenso cu tin pa siña toca un instrumento / siña musica y den e caso aki e Dande.
Un parti di nos folklor cu ta di gran importancia, e Dande, cual mester por keda bibo y traspasa di un generacion pa e otro. Porta pa Harmonia ta brinda e oportunidad y espacio pa logra esaki, caminda cu gratuitamente ta forma e structura y base musical di e Dande.
Hobennan a siña e canto, e anecdota y e intercambio segun cada bario su historia. Raquel a enfatisa riba e importancia di laga nos muchanan forma parti di les di musica pa nan desaroyo personal.
Ta encurasha cada hoben pa probecha di e oportunidad aki, e ta completamente gratis y e balor agrega di por domina un instrumento ta inmenso.
Un scol di musica den cada bario ta un iniciativa di gran balor. No ta tur mucha tin e mes un oportunidad di por yega un scol, no tin e recurso financiero y oportunidad di por acudi na un scol di musica. Pa trece un scol di musica mas cerca di e comunidad, den e bario ta habri un porta di speransa grandi na tur mucha/hoben cu un dia a soña di por siña toca un instrumento.
Raquel Lampe ta enfatisa riba e interes di e hoben awendia, tin cu purba cera e ‘gap’ cu tin entre locual ta actual y e musica tradicional/ cultural pa asina lanta e interes entre nos hobennan pa siña instrumento y musica en general.
Inculca interes pa nos Dande y/of musica cultural for di chikito caba, pa asina nos mira mas hoben den festival y presentacionnan cultural. Pa nan lanta cu e amor pa locual ta di nos. P’esey e importancia di Porta pa Harmonia den bario.
Porta pa Harmonia den bario ta un aporte enorme na brinda oportunidad pa siña musica. Oportnuidad na hopi mucha/hoben cu no tin e manera ni forma pa yega un scol di musica, pero cu awo ta haya esaki den nan bario mes. Tambe lo produci mas musico riba nos ilsa, ta locual cu Tico Kelly a indica.
E ta un oportunidad grandi y importante pa nos mucha/ hobennan y nan desaroyo, di por tin e chens di forma parti di un tayer di musica asina aki. Ta spera di mira e siguiente tayernan cu lo tin planifica duna realce na entre otro Dera Gay, Himno y Bandera, como tambe expone nos hobennan toca un waltz, danza, tumba, mazurka na aporte di nos folklore y cultura.
