Recientemente a introduci na publico general ‘Revista SER Caribe’, un revista digital di contenido cultural, artistico y academico. E acto di gran transcendencia aki a tuma luga den presencia di un audiencia interesa na Biblioteca Nacional di Aruba (BNA) dia 4 di december 2025.
Revista SER Caribe su nomber ta expresa un sintimento di identidad y di pertenencia. No tin nada mas autentico cu por duna identidad na un pueblo cu su expresionnan cultural. Y esey ta e obhetivo principal di e medio nobo aki www.revistasercaribe.com: fortalece e integracion di nos region Caribe saliendo for di su particularidad idiosincratico y su diversidad cultural, expresa den arte, literatura, gastronomia, multiculturalidad, multilingualismo y tanto otro aspecto mas. Esaki ta e motibo principal pa gestor cultural y directora di e revista, Maria Isabel Cabarcas Aguilar, bini cu e iniciativa aki pa uni e esencia di SER Caribe den un publicacion bunita diseña. Un aspecto importante ta cu Revista SER Caribe ta habri pa tur sorto di publicacion di tur ser di Caribe pa tur ser di Caribe den cualke di e lenganan existente den nos Region Caribe insular y continental.
Sra. Cabarcas Aguilar, kende ta abogado y trahado social, ta un emprendedor social y columnista di opinion cu na 2015 a lanta Fundacion InspirARTE na Riohacha, Guajira, Colombia. For di su lantamento Fundacion InspirARTE a percura hunto cu Fundacion Rancho pa promove union y fortalece e lasonan cultural entre Guajira y Aruba. Un proceso cu, en realidad, a cuminsa mas cu un decada pasa, na 2013, a base di e relacion personal profesional di Sra. Cabarcas Aguilar y Sr. Clifford Rosa, y cu a keda expresa den diferente evento, tanto na Aruba como na Riohacha.
Sinembargo, e intencion tabata pa expande e integracion cultural aki cu resto di Caribe insular y continental. P’esey, e prome edicion di Revista SER Caribe ta conta cu colaboracion di 30 persona di shete pais di nos region Caribe: Aruba, Colombia, Corsou, Cuba, Merca (ciudad di Miami), Puerto Rico y Republica Dominicana. E sintimento di integracion aki a keda ilustra riba e portada yamativo di e revista pa medio di e obra ‘Tejiendo el Gran Caribe’ di e artista plastico di origen Wayúu, Yei Durán.
E directora di Revista SER Caribe a expresa su gradicimento na tur esnan cu a forma parti di e prome edicion di e revista digital menciona cu nan contribucion, entre nan autor, poeta, historiado y artista, cu a brinda nan valioso apoyo pa e proyecto aki por a bira realidad. E revista, cu ta uno multilingual, ta bira un publicacion semestral, y e proximo edicion lo sali na luna di mei 2026. Eventualmente e lo por bira un revista imprimi, pero esey ta depende di e sosten cu por logra haya di instancianan gubernamental y/of priva, asina Cabarcas Aguilar a bisa.
E lansamento di e revista a conta cu presencia di un publico masha interesa riba e proceso di integracion, tanto cultural como social, entre Aruba y La Guajira. Nan a expresa nan interes di apoya e iniciativa aki y te hasta algun di nan a compromete nan mes di colabora cu Revista SER Caribe. Otro a manifesta e necesidad di por estrecha e lasonan humano entre e dos regionnan cu un compania aereo cu por bula regularmente entre ambos destinacion.
E apertura a conta cu presentacion di e cantautor Arubiano Glenda Zavala, kende ta un representante di musica Vallenato na Aruba. Na final a tuma luga un conversatorio ameno tocante, entre otro, proceso di integracion, cultura Caribense, laso familiar y historia. Linguista Ramon Todd Dandaré tabata moderador di e conversatorio aki, cu a conta cu participacion di Maria Isabel Cabarcas Aguilar, directora di Revista SER Caribe, Clifford Rosa, presidente di Fundacion Rancho, y Benjamin Romero Barliza, autor y periodista.
Pa clausura Sra. Cabarcas Aguilar a gradici Directora di Biblioteca Nacional di Aruba, Sra. Astrid Britten, pa facilita e instalacion di e biblioteca pa introduccion di Revista SER Caribe y tur esnan presente, entre nan Parlamentario y ex-Minister di Cultura Xiomara Maduro, pa nan asistencia.
