Den politica, no tur pregunta ta un acusacion. Pero tur pregunta merece contesta, specialmente ora ta trata di transparencia, legalidad y uzo di poder publico. E biahe di minister Gerlien Croes den un avion priva a lanta precisamente esaki: e preguntanan serio cu, te dia di awe, no a wordo contesta claramente. Y ora ley ta cla, silencio ta bira preocupante.
Ley di Aviacion: Claridat sin ambiguedad
“Segun investigacion di e leynan di aviacion, e regla ta straight: bo no por paga ningun hende ni compania pa biaha den un avion priva. Punto! Saliendo di e marco legal aki, ta surgi un conclusion importante: pa motibo di ley, minister Croes no por a paga un persona of un compania pa e biahe aki,” Pieters a vocifera. Sinembargo, den prensa, den un reunion na november y incluso mas trempan den Parlamento, minister Croes a declara cu el a paga “algun shen florin” pa e biahe di trabou den avion priva. E declaracion aki ta crea un contradiccion directo cu loke ley ta permiti.
Ken exactamente minister Croes a paga y pa kico?
“E preguntanan central ta simpel, pero nan tin un peso enorme di integridad y honestidad.
El a paga un landing fee? El a paga e doño di e avion? El a paga un compania? Of el a ricibi e biahe como un sponsor of regalo? Cada di e opcionnan aki tin su consecuencianan legal y etico diferente. Pero sin claridad, pueblo no por evalua nada. Transparencia no ta un luho; e ta un obligacion pa cualkier mandatario,” Pieters a enfatisa.
Un asunto cu mester haya claridad
Pa fraccion di PPA, esaki no ta un cuestion di asunto personal ni un atake politico. Esaki ta un asunto di principio. Pueblo tin derecho pa sa con un minister ta cumpli cu ley, specialmente ora e mesun ta referi na pago. “Nos kier haya sa den un forma transparente kico precies a pasa,” ta e posicion cla di PPA. No pa crea scandal, sino pa haya claridad di e asunto aki na un forma corecto, completo y definitivo”.
Finalmente Pieters a indica, cu ora un minister bisa cu el a paga pa un biahe, cu segun ley no por wordo paga, e preguntanan ta legitimo, necesario y urgente. “Silencio of interpretacion no ta proteccion; e ta debilita confiansa. Si no tin nada pa sconde, transparencia ta e mihor aliado.
Politica responsabel no ta basa riba loke por pasa despercibi. E ta basa riba claridad, transparencia y respet pa ley. Y te ora cu e preguntanan aki haya contesta claramente, e biahe priva aki lo sigui keda aire, door di e duda cu e tin rond di dje.
