Riba 21 di december 2025, e famia Rasmussen Henriquez, hunto cu Cultuurfonds Caribisch Gebied (CCG), tabata orguyoso di fungi como anfitrion pa e prome ceremonia di Belva Award. E premio aki ta honra artistanan contemporaneo emergente cu a destaca na Aruba. E aña aki, e Belva Award a wordo presenta na Sra. Kim Violenes, kende a wordo reconoci pa su vision artistico excepcional y su contribucion na e paisahe cultural di e isla.
Ademas di e Belva Award, a otorga un Mencion Honorifico Belva na Sra. Carolyn Geerman, como reconocimento pa e calidad excepcional di su trabou. E distincion aki ta wordo duna den añanan caminda e obranan presenta ta demostra un forsa remarcabel den general, y lo por wordo otorga den futuro ora esaki ta mereci.
Tocante Belva Award
E Belva Award a wordo crea na honor di Sra. Belva Rasmussen Henriquez. Belva tabata un yiu di tera di Aruba, naci di e mayornan Sr. Benjamin (Benny) Titus Henriquez—kende tabata e prome director general di Caribbean Mercantile Bank (CMB) na Aruba—y Sra. Henriette (Etty) Adelaida Henriquez. Despues di a casa cu su esposo, Sr. Walter Rasmussen, y a muda pa Merca, Belva a sigui bishita Aruba multiple biaha pa aña hunto cu su famia, manteniendo su cas y su conexion cu su luga natal te ora el a fallece na 2024.
Su pasion pa bida largo pa cultura, arte, y su amor profundo pa su isla natal Aruba, a inspira su yiu homber, Ben Rasmussen, pa establece un fondo pa apoya artistanan local emergente.
“Arte y cultura a hunga un papel asina importante den e bida di mi mama y di nos famia, y nan ta un parti vital di e herencia di Aruba. Creando un manera sostenibel pa apoya y anima artistanan local pa crece tabata e manera ideal y mas significante pa honra mi mama. Esaki ta uni algun di e cosnan den cual e tabata kere mas tanto: arte, cultura, y duna bek na bo comunidad,” Ben Rasmussen a comparti.
E premio anual aki tin como meta pa stimula talento nobo pa crece y contribui na e futuro cultural di Aruba—reflehando asina e legado perdurabel di Belva.
