E Bruha, Bruhá a gana e premio prestigioso “Kadushi di Oro” 25 di Krioyo Film Festival na Corsou. E anuncio tabata efectua pa Prome Minister di Corsou, su Excelencia Gilmar Pisas.
E impacto di e pelicula Arubano aki di productor Desiree Croes, durante di Krioyo Film Festival 2025 na Corsou, tabata grandi y e hurado a eligie e miho pelicula di e festival.
Banda di e pelicula di aña, E BRUHA BRUHÁ a logra tambe e premionan di miho actris di reparto y tambe miho director. E miho actris di reparto tabata Yvonne Tromp pa su rol di e wela “Dudu” den EBB. Desiree Croes a bira e miho director di pelicula largo.
Na nomber di e produccion completo di Berea Production, inclui tur actor y productor, Desiree Croes, orguyoso director ganado, ta gradici pueblo di Aruba y di Corsou, sin lubida gruponan na Hulanda cu a honra nos cu e bishita na nos pelicula. Danki Prensa di Aruba inclui Tele Aruba. Mas cu 2000 Arubano a bishita EBB e aña aki. Tambe danki y pabien na Semi Chahmi y su crew pa e excelente trabou efectua.
E Bruha, Bruhá ta e di 12 pelicula produci pa Desiree Croes y ta di dos biaha cu e premio Kadushi di Oro ta bin Aruba. E otro tabata aña pasa pa e pelicula E Berguensa.
EBB ta un storia largo saca for di e buki di Desiree Croes titula “No Mas” y ta trata di e lucha di tres dama, mama, yiu y wela, contra e malbado director di Parke Nacional cu kier kita nan cas di cunucu for di nan y asina combertie den Airbnb.
