Ma sabi esaki,cu den e ultimo dianan temponan trabahoso lo bini , pasobra hende lo ta stimado di nan mes.Esaki ta para scirbi den 2 Timoteo 3:1-5 splicando tur e cambionan cu lo bini den karakter di hende.
Awor ta tempo pa tur hende sa cu e tempo ta trabahoso y dificil, y cu e tempo no ta bay bira bon, pero a yega tempo awor mas cu nunca pa cada mayor sea e ta casa of no, bira serio y cuminsa lanta yuinan balente den tur sentido di palabra.
Hopi mayor ta haci yiu grandi prome cu su tempo, pa asina nan por sigi move cu e bida parandero bao di pretencion cu nan mester gosa di nan bida.
Como tata of mama, bo mester tuma e reponsabilidad di lanta bo yiu balente.
Boso bida mester ta un testimonio den bista di boso yiu, pasobra no tin mihor mentor pa un yiu, cu su propio mayornan, pasobra bo tin mandato y bendicion di Dios pa hacie.
Bo presencia den bida di bo yiu y bo palabra pa lante e mucha y no pa kibra e mucha, ta e mihor terapia cu e mucha por ricibi.
Nunca balota ni tampoco limita bo mes pero haci tur esfuerso pa lanta bo yiu balente.
Lanta bo yiu den e caminda di Dios( Efesionan 6:4), no tarda y laga nada pa mayan, pasobra e diabel no ta laga nada pa mayan e a bin pa horta mata y destrui, sinja bo yiu haci oracion, sinja bo yiu e caminda di respet y obedencia na Dios, no bisa e ta chikito, pasobra maldad y inmoralidad, no ta respeta edad.
Sinja bo yiu papia berdad den tur situacion, pasobra berdad ta haci hende liber y asina e mucha ta lanta cu integridad, pasobra integridad ta bini di Dios, hende cu tin Dios den nan curason ta integro, hende cu nan curason ta mara na placa, no por para pa integridad, hende cu nan curason ta dobbel, yena cu mentira y inmoralidad, no ta integro, asina ta cu deber di un mayor ta pa lanta su yiu den integridad.
Respeta bo yiu, pa bo yiu tambe respeta bo, no maltrata ni fisicamente, tampoco verbalmente, wak pa bo palabra ta sazona cu sabiduria y inteligencia, cu ta sera porta di e enmigo, y cu ta evita cu amargura por drenta den e mucha su curason y asina contamina su bida.
Laga e mucha sa cu bo no ta perfecto ( Filipensenan 3:12-15). Pero cu bo tambe ta haci tur esfuerso cu yudansa di Dios pa permanece den e caminda di Dios, y cu bo tambe ta den guera spiritual contra e trikinan di diabel.
Tambe laga e mucha sa for di tempran cu tur locual cu bo tin ta Dios a yuda bo yega na dje, pa e mucha compronde cu den bida hende mester esforsa y sea balente, no ta importa si bo ta homber of muher.
Haci tur bo esfuerso pa no cria un yiu malcria, pasobra malcriansa ta un berguensa dilanti di Dios, y dilanti di hende,no lubida cu un yiu ta un regalo di Dios,nan ta un herencia di Senjor,y fruta di barica ta un recompensa.( Salmo 127:3).
Especialmente e hobennan mester sa cu esun cu haci bon lo ricibi recompensa di Senjor pasobra tur locual cu ta bon ta bini di ariba for di nos Tata cu ta den cielo.
Pasobra esun cu haci malo lo ricibi consecuencia di e maldad cu e a haci y esey sin distincion di persona,
Lanta bo yiu balente den tempo dificil.
Sinceramente , Pastor Marcel Balootje
