Den tur e scuridad cu ta rondona mundo henter, e lus di Dios ta surpasa tur cos y e palabra di Dios ta encurasha nos bisando:
Y no laga nos cansa di haci bon,pasobra na debido tempo, nos lo cosecha,si nos no desmaya.
Asina ta anto, mientras nos tin oportunidad,laga nos haci bon na tur hende,y specialmente na esnan cu ta di e famia di fe.( Galationan 6:9-10).
Ora nos haci bon , bon ta bini pa nos, y no ta importa na ken nos haci bon, pasobra e palabra di Dios, ta bisa haci bon na tur hende, si nos tene cuenta e homber Samaritano no a wak na ken e ta haci, pero e a haci bon.
Asina ta cu den nos bida, nos mester haci bon, pasobra haciendo, bon nos ta imita Dios, pasobra bondad ta bin di Dios.
Bondad ta naturalesa di Dios. Maldad ta naturalesa di diabel kende ta bini solamente pa horta, pa mata, y pa destrui.
Pero te ainda tin hopi hende cu no ta comprende esey, of no kier comprende, of ta kere cu nan por haci wega, y cana den dos caminda.
Nos no ta bibando den un tempo cu hende por gamble cu nan bida, pasobra tur hende ta mirando e diferencia entre malo y bon, pasobra ta dos caminda tin e caminda di berdad cual ta caminda di Dios, y e caminda di maldad, scuridad, inmoralidad,cual ta e caminda di diabel.
Y ta masha facil pa nota den cual caminda un hende ta cana , esey ta bini di e frutanan cu su bida ta duna.
Pesey nos mester bisa nos hobennan constantemente, cu mal amistad ta danja bon compania, y cu si bo cana cu hende sabi lo bo ta sabi, pero si bo cana cu hende bobo, lo bo sufri danjo.
Pasobra nos ta e obra di Su man, crea den Cristo Hesus pa bon obranan, cual Dios a prepara di antemano pa nos cana den nan.( Efesionan 2:10).
Ora nos ta haci bon nos lo mira manifestacion di Dios den nos bida,pasobra bondad ta yama positivismo. Pas y trankilidad.
Ma stima boso enemigonan,y haci bon,y fia sin spera di hanja nada bek, y boso recompensa,lo ta grandi, y boso lo ta yuinan di e Altisimo. Pasobra E mes ta carinjoso cu ingratonan,y malbadonan. Sea misericordioso, mescos cu boso Tata ta misericordioso.
Y pa preveni cu nos no ta cana den caminda di falsedad y dishonesto, Dios su palabra ta sinja nos lo siguiente, Tene bon cuenta cu esaki:
Lipnan mentiroso ta un abominacion pa Senjor, ma esnan cu ta trata cu fieldad ta Su Delicia.(Proverbionan 12:22).
Awor mi ta roga boso,rumannan tene na bista, esnan cu ta causa division, y strobacion,contrario na sinjansa cu boso a hanja,y aparta boso for di nan.( Romanonan 16:17).
Ay di boso, escriba y fariseo,y hipocritnan! Pasobra boso ta manera tumbanan blancha,cu di pafo ta mustra bunita,ma di paden ta yen di weso di hende morto,y di tur sorto di sushedad.
Asina boso tambe di pafo ta parce husto na hende, ma di paden boso ta yen di hipocrecia y maldad.(Mateo 23;27-28).
Hopi profeta falso lo lanta,y lo ganja hopi hende, y pasobra inikidad ta aumenta amor di hopi hende lo fria.( Mateo 24:11).
Y hopi lo sigi sensualidad, y pa nan motibo, e caminda di berdad lo wordo blasfema.( 2 Pedro 2:2).
Aunke con e tempo bira, maske nos ta mira con hende ta traiciona hende, laga nos sigi haci bon, pasobra bondad lo triunfa riba maldad , mescos cu nos Cristo Hesus a derota e diabel.
Sinceramente, Pastor Marcel Balootje
