Durante e dia di dialuna a cuminza circula riba social media varios informacion relacioná cu e hit & run cruel cu a sosodé dilanti di Wind Creek Casino.
Manera a wordo conoci, diadomingo anochi prome cu medianochi, un SUV di color preto a dal dos peatón mortalmente y a bandoná e lugar di e accidente. E dos victima tabata un pareha cu tabata disfrutando nan anochi y tabata rumbando pa nan vehiculo na momento di e impacto.
Riba social media a circula e informacion cu, den menos cu un ora despues di e incidente, e dama hoben chauffeur a wordo haya na Bushiri, a wordo deteni y cu e auto — un Jeep — a wordo confisca. Sin embargo, durante dialuna tabata circula rumor cu e dama a wordo laga na libertad debido na varios factor.
Confirmacion di Ministerio Publico
Nos a tuma contacto cu Ministerio Publico pa clarifica e informacion aki. Ministerio Publico a confirma oficialmente cu e dama chauffeur involucrá den e caso ta actualmento deteni.
Segun e informacio oficial, despues cu dos dia a pasa — e dama lo mester presenta dilanti di un Huez Comisario, unda cu Ministerio Publico lo solicita prolongacion di su detencion preventiva, probabelmente te ora cu e caso por bin dilanti di tribunal.
Esey ta e informacion oficial pa aclara tur especulacionnan cu ta circula riba social media.
Nos ta consiente di tur e detallanan cu ta wordo comparti online y nos ta sigur cu practicamente henter Aruba a lesa y a mira kiko a wordo publica riba social media. Pa e momento aki, nos ta compartiendo solamente e informacion confirma di e instancianan oficial.
