Tin informacion cu un droga hopi peligroso y traicionero ta circulando na Aruba. Segun e señalnan y descripcionnan cu ta circula, por ta trata di un opioide sintetico (manera fentanyl of algo similar), un tipo di droga conoci pa su efecto fuerte y impredecibel.
E droga aki ta traicionero pasobra, na principio, e persona cu ta us’e ta sinti un efecto cu por parce “leve” of placentero, y esaki ta haci cu e usuario ta pidi mas y mas. Pero e peligro ta den cu e efecto real ta bin di patras. Ora e golpi fuerte di e droga bin, hopi biaha e persona ya a pasa e limite, drentando directamente den un overdosis sin sa.
Un fuente anonimo a splica cu ora un hende ta riba e droga aki, e ta drenta den un otro mundo, unda e no tin control riba su mes.
Pensamento y reaccion ta keda swak, coordinacion ta perdi, y huicio ta cambia drastico. Pa e motibo aki, e fuente ta enfatisa: keda leuw di auto, no stuur.
No ta descarta cu accidentenan reciente di trafico por ta conecta cu chofernan cu tabata bao di influencia di e tipo di droga aki. E combinacion di fantasia, perdida di control y reaccion traag ta pone no solamente e usuario, pero tambe otro usuarionan di caminda, den peligro serio.
Ta recomenda pa evita contacto cu tur droga pero tambe pa esunnan desconoci, y reporta cualkier informacion sospechoso. E droga aki no solamente ta destrui bida, pero por tuma bida tambe.
Si bo sospecha cu un hende ta usando e tipo di droga aki, papia cune y busca ayuda y notifica e instancia apropia. Bida ta mas importante cu silencio.
