Bijbel ta bisa cu hende ta wordo identifica pa nan curason ( 1 Samuel 16:7) Dios ta wak curason di hende, pasobra den curason di hende tin hopi cos cu nan por sconde pa hende , pero no por sconde pa Dios.
Anto pesey nos mester samina nos curason, pa nos no wordo contagia cu malicia, maldad y inmoralidad, cu por drenta nos curason via pensamento of obranan cu nos ta haci.
Pasobra no tin ningun hende bon, solamente nos Tata cu ta den cielo . Y hopi biaha nos ta kere cu nos tin cierto derechi di haci algo, pero esey no ta bin di Dios, pero e ta bini di un curason cu te ainda no ta libera , un curason cu no a bandona su camimda bieu.
Den e buki di Hechonan capitulo 8:20-23 Pedro ta reprende Simon cu te ainda despues di a batisa y tabata cana cu e Apostelnan te ainda tabatin tin deseo den su curason cu no ta cuadra cu e palabra di Dios.
Asina tambe tin hende cu tin cu saca amargura for di nan curason, pasobra nan no por soporta crecemento di nan prohimo, tin hende hasta ta envidia na propio yiu , esposa, esposo, pa locual Dios ta haciendo den nan bida, no papia mes di nan prohimo, den un palabra bisa cu asina crecemento di bo prohimo ta molestia bo, chek bo curason.
Pasobra Orguyo, Envidia y Arogancia, no tin frontera, no ta respeta ningun hende, no ta importa con spiritual bo ta, ni tampoco cuanto anja bo tin den Cristo, nos tur ta keda vulnerabel, pa atake di diabel.
Maldad ta bini di diabel, bondad ta bini di Dios, pleito, rabia, discucion, falta di respet, discriminacion, orguyo, arogancia, tur esey ta herment di diabel contra hende, y si nos no samina nos curason y wak si nos ta den boluntad di Dios, e enemigo ta pasa un fastball.
Warda bo curason riba tur cos,pasobra e ta e fuente di bida,kita for di bo un boca enganjoso y tene lipnan perverso leu for di bo. ( Proverbionan 4:23-24)
Un curason alegre ta haci cara contento, ma ora cu e curason ta tristo e spirito ta kibra ( Proverbionan 15:13).
E bon hende for di e bon tesoro di su curason, ta saca loke ta bon, y e mal hende, for di e mal tesoro, ta saca loke ta malo,pasobra for di e abundancia di curason , su boca ta papia.(Lucas 6:45).
Un mayor mester tin un bon curason pa su famia, pasobra a base di su curason, e educacion ta pasa over pa su yiunan, si e curason ta perverso, falso, yena cu hipocrecia y maldad, ta esey ta locual e yuinan ta ricibi, y hopi biaha mayor no ta tene cuenta cu pa medio di nan comportacion nan ta sembra simia di error den nan hogar.
Ta masha peligroso pa haci manera nos ta algo y den nos curason nos ta leu for di Dios, (2 Timoteo 3:5). Pasobra den nos bida nos por haci wega cu tur cos, pero no haci bofon di Dios, pasobra na e momento no espera Dios mes lo basha tur cortina abao y demostra e berdad cu tin den nos curason.
Bendiciona ta esnan di curason limpi, pasobra nan lo mira Dios. ( Mateo 5:8).
Ora nos ta pidi algo na Dios, Dios ta wak nos curason, pasobra locual bo curason ta yen di dje, bo boca ta papia, pesey ta masha importante pa warda nos curason, y no sea pura, pa rabia y warda amargura den nos curason.
Dedica bo curason na Cristo Hesus.
Sinceramente, Pastor Marcel Balootje
