Shonnan, saludos ! E “Hoorzitting” a tuma lugar Diahuebs dia 15 di Januari ultimo, un dia despues cu nos dushi y bunita Mama Petronilia Mercedes Bergen Tromp a cumpli 3 luna cu e no tey mas cu nos fisicamente. Negligencia na Hospital a causa su morto na cas despues di un siman bek na cas fei hospital e.o. e no por a guli mas y despues di mas o menos 2 siman, nos Papa a siguie di tanto verdriet y tristeza. Nan tawata cu mi cu nan Dushi consuelo.
For di ariba nan a guiami na e Hoorzitting cu un panel di 5 persona, cu Dr. Dave Lacle nan tawata 6 y mi persona Ruthy acompanja y sostene pa amigo y super excelente Dokter Ike Posner. Nos a expresa di curason firme e puntonan cu nos a keha di nan, den cual nan a faya barbaramente y a dialoga un rato cu Dr. Lacle cu a splica su banda di medaya. No tur cos tawata cuadra ni convincente, mirando cu algun di e tratamentonan y fechanan no tawata cuadra cu splicacion di su curason si,cu lo a cay bao di otro zaalartsnan y of chirurg, pero e punto cu ta keda ,cu, pakiko tanto infuus cu glucose y pakico tanto pilder di calmante durante dia, riba cual ningun a duna nos un contesta. Pakico opdracht duna via telefon y bisa cu dokter ta druk .Y nos lo of lo no hanja mas contesta tampoco probablemente den un carta cu nan ta bay manda pa nos cu mencion di y of algun cambio y of maneranan di mehoracion den hospital. Esey lo no yuda nos na nada, pasobra palabra bunita no lo ta mescos cu bon accion tuma. Pueblo kier mehoracion y cambio den nan maneho di cuido y duna atencion. No promesanan talbes fofo ariba papel. Ya ta pa basta tempo mas di nos grandinan a wordo neglisha y of no bon cuida den hospital causando nan morto . Y te ainda nan ta sconde tras di nan protocolnan di nenga famia e medisch dossier cu por hanja inzage riba dje riba nan computer, pero nan no ta bisabo esey. Y nan no por a bisa si lo manda un carta tambe pidiendo disculpa na famia pa nan fayonan. Nada di esakinan por trese nos mama y tata bek na bida. Nos punto cu nos a ripiti na nan ta, pa NO laga e cosnan aki ripiti cu otro di nos grandinan. Nan a cuminsa un crenchi bruha bisando un fecha cu no ta e fecha cu mi keho na nan a wordo entrega. Y un otro fecha cu e carta di keho manda pa e zaalarts Dirk Tempel. Nan a bay bek den tempo usando e fecha di 1 di September, mientras mi keho a wordo entrega oficialmente dia 13 di Oktober. Kiko nan kier tapa y of sconde ? Ufffffffffff. Anto no ta profesionalnan trahando ? Nos a bisa nan cu aki den no tin ganador. Ami a perde mi mayornan y nan a perde e confianza di pueblo. AZV tambe a perde, pasobra dokternan no por cumpli cu nan promesa di yuda sana, cuida y salba pasobra tin cu baha gasto? Pero cu nos por ta Vencedornan cu Christo den nos bida ora nos stima, cuida, pordona, yuda y hasi bon cu su mandamentonan na mente te na unda permiti pa comunidad. Nan kier a graba e Hoorzitting aki, pero nan no tawata kier pa nos a grabe tambe. Wel, aunke ningun e ora a graba, mi ta sigur cu nan lo a hasi algo den un otro forma, mirando tur e fayonan intencional of no intencionalmente den nan emailnan manda regularmente pa nos persona durante e tempo desde cu e keho a wordo entrega.
Nos no sa si nos lo ricibi un copia di nan notulennan nota riba papel tampoco. Un secrecia di otro mundo ! No ta sconde e berdad bau di kokodek mas shonnan ! Berdad semper lo sali na cla .
Lief di nan di a pone un caha di kleenex riba nos mesa, pero ta locual nan mes casi tawatatin mester di dje. Nos no a drama lagrima, nos a enfrenta nan firme y netjes sin palabra malo. Y nan no a falta nos respet tampoco. Ban wak kiko lo sali for di esaki. Nos ta spera cu nos por sera e capitulo aki pronto , sperando riba nan carta. Ban wak cuanto tempo tin cu warda ariba esaki. Si mas cos di e Hoorzitting bin ariba, nos lo continua den un otro relato otro siman Dios mediante. Manera Lady Ruth a priminti, nos ta skirbi pa pueblo cosnan cu por inspira nos tur ! Y nos a sigui nos curason tambe di a duna un entrevista na EANEWS den fin di siman cu permiso pa forward pa coleganan den prensa dialuna, pasobra ta fey cuminsamento nos tawata informa pueblo di e desaroyonan pa cu e situacion aki di HOH cu nan Hoorzitting. Nos a duna un chispa di nos opinion den nos forma simpel pero firme pa informa pueblo ya cu no ta tur ta lesa corant pa motibo di nan bista. Danki na tur otro cu si por y ta lesa nos relato di e siman aki cu hopi atencion atrobe, y pasa un dushi dia yen di sabiduria den nos alegria !
Corda bishita bo grandinan y bisa nan cu bo ta stima nan ! Puntranan contabo cosnan di antes pasobra nan ta nos herencia humano cu nan mesun lesnan y experiencianan. Nos curason ta hopi trankil bek, nos fe mas fuerte y nos amor pa nos grandinan infinito. Mi Mama no tawatatey pa papia di con nan a trate, ami su unico yui muhe a papia p’e pasobra ami tawata tey henter e siman na hospital cu n’e di mainta te anochi . HOH NO neglisha ningun patient, principalmente nos grandinan ! Corda cu orea ta tende y wowonan ta mira ! Y si no tin murayanan pa tende y mira tin algo ainda cu ta yama “Consenshi” y Karma. Ah siiii! Danki pa e bon comentarionan riba nos Docter song, nos cantica di dokter cu a sali riba facebook y wassap y nos cantica tambe di Hoorzitting. Letranan di Lady Ruth y musica di AI cu e fantastico cooperacion di amigo dokter Ike Posner, un shon di hende cu un bunita curason.
