Gobierno di Aruba ta anuncia cu orguyo cu profesor Michael Sandel di Harvard University lo ta e keynote speaker durante e International Common Good Conference, cu ta tuma luga dia 29 y 30 di januari 2026 den cuadro di 40 aña di Status Aparte.
Ta considera Sandel como un di e pensadonan publico mas influyente di nos tempo y pa su talento di haci filosofia moral y politico accesibel pa tur hende.
Un bos cu ta lanta mundo
Cu su bukinan best-seller What Money Can’t Buy y The Tyranny of Merit, Sandel a habri un debate mundial tocante e limite di pensamento di mercado, e balor di solidaridad y e pregunta di kico nos debe otro como ciudadano den sociedad. Su klasnan y lecturanan na Harvard ta entre esnan mas bishita den historia di e universidad y miyones ta sigui nan online. E ta reta lider- y ciudadanonan pa no solamente puntra “kico ta funciona?”, pero mas cu tur cos “kico ta corecto?”, un pregunta cu ta toca e curason di e tema di e conferencia: e Bon Comun.
Harvard y e debate publico
Harvard University, un di e universidadnan mas antiguo y prestigioso na mundo, tin un tradicion pa ta pone nan conocemento na servicio di sociedad. Sandel ta representa e tradicion aki: e ta hiba filosofia for di e lokaalnan di universidad pa espacionan publico. Cu precisamente un filosofo di e nivel aki ta bin Aruba, ta mustra cu nos isla ta bira un plataforma serio pa combersacionnan internacional pa reflexiona riba nos sociedad, democracia y desaroyo sostenibel.
Pakico esaki ta asina importante pa Aruba
Pa un comunidad chikito, e Bon Comun no ta teoria sino realidad di tur dia. Limitenan di naturalesa ta visibel, por sinti y mira desigualdad y e cohesion social ta un necesidad vital. E conferencia ta duna Aruba e oportunidad pa papia for di su propio experiencia unico riba nivel mundial tocante e preguntanan grandi di nos tempo.
E mensahe central ta cla: un sociedad ta florece ora su institucionnan, economia y cultura ta crea condicionnan unda hende por biba cu dignidad, cuida pa otro y pasa e mundo habitabel pa e proximo generacionnan. E bishita di Sandel ta duna e combersacion aki un profundidad extraordinario na momento cu nos ta reflecciona riba 40 anja Status Aparte y nos responsabilidad pa futuro.
Di practica pa rumbo
E Common Good Expo y International Common Good Conference hunto ta forma un solo movemento: di tuma accion cu pensamento profundo y cu un compas moral. Mas cu cincuenta organisacion social lo mustra durante e Expo con e Bon Comun ta bira realidad den bida diario, mientras pensadonan internacional y local lo indica rumbo pa futuro.
Minister-President Mike Eman:
“Cu un persona manera Michael Sandel ta bin Aruba ta un honor enorme. Su mensahe ta recorda nos cu economia, politica y tecnologia al final mester ta na servicio di dignidad humano. Pa Aruba esaki ta un momento historico: nos ta bira un sitio di encuentro unda mundo ta reflecciona tocante e tipo di sociedad cu nos kier construi hunto.”
E organisadonan di e conferencia y expo ta invita ciudadano, hubentud, organisacion social y partnernan internacional pa participa den e evento unico aki. Dos dia, un meta comparti: fortifica confiansa, dignidad y solidaridad: e cas cu nos ta construi hunto.
