E hombernan A.T., R.d C., S.R. a presenta dilanti Hues pa scucha nan sentencia. R.d C. y S.R. ta wordo acusa di preparacion pa asesinato of mata mientras cu A.T. ta wordo acusa di posecion di arma di candela.
SOLO DI PUEBLO por a compronde cu e Team di Aresto a haya un cantidad di arma y balanan. Tambe a haya pañanan preto y muts preto cu ta mustra cu ta un preparacion tabata tumando lugar.
ACCION DI TEAM DI ARESTO
E caso a wordo trata aña pasa December 2025 y ta relaciona cu un accion cu Team di Aresto a haci na un cas na Pos Chiquito dia 6 September 2025.
E miembronan di Team di Aresto a constata cu tabatin dos auto, un Hyundai y un Honda. Na e Hyundai tabata para R.d C. y S.R. mientras cu den e Honda a haya A.T. Den e Hyundai a haya diferente arma di candela y balanan y den e Honda a haya A.T. cu un tas den cual tabatin un pistool Glock cu dos peña largo cu 32 bala. Tambe a haya den e auto un otro tas cu un revolver cu bala.
SENTENCIA
Hues a bisa cu A.T. a admiti di tabatin arma den su posecion. Hues ta haya legalmente proba cu A.T. tabatin arma y balanan cun’e.
Hues a bisa cu arma di candela cu bala ta un peliger pa comunidad. Mester combati esaki. El a sigui bisa cu posecion di arma den auto ta un asunto serio. E maneho di Corte di Husticia ta, pa baha cu man duro contra esaki. E castigo stipula ta 18 luna di prison di cual 6 luna ta condicional cu 2 aña di prueba. Hues a bisa cu e no ta mira motibo pa desvia di e maneho y a condena A.T. na 18 luna di prison di cual 6 luna ta condicional cu 2 aña di prueba.
Hues ta haya cu S.R. y R.d C. ta culpabel di preparacion di asesinato of mata. Hues a mustra cu Polis a haya 6 September 2025 e duo aki cu paña preto y mascara preto. Ademas a haya den e Hyundai diferente armanan di candela y 65 bala cayente.
Hues a mustra cu S.R. a haci video dia 8 Augustus 2025 di e armanan y tambe a expresa cu lo mata esnan cu machine. Tambe a expresa cu e no tin miedo di bay sera. S.R. a bisa tambe cu si bay tira riba su primo R.d C., e lo tuma represaya.
Hues a bisa cu tin 3 scenario cu ta mustra cu S.R. y R.d C. lo bay usa e armanan pa mata e enemigonan. Esaki Hues ta considera preparacion di mata y no asesinato. Mirando e coopeacion estrecho entre S.R. y R.d C., Hues ta haya nan culpabel di complice di preparacioin di mata.
Hues a bisa cu e ta haya cu no por papia aki di un preparacion di asesinato. Hues a rechaza e defensa di abogado cu e arma cu a haya R.d C. ta di S.R. Hues ta haya cu R.d C. tabatin e arma den su poder y como tal e ta culpabel di posecion di arma.
Hues a bisa cu ta hopi preocupante cu e sospechosonan S.R. y R.d C. kier regla cuenta di e forma aki. Esaki ta condenable. Ademas R.d C. tabatin droga cun’e. Hues a sigui bisa cu anterior R.d C. a haya condena pa droga y a haci e delito aki den su tempo di prueba.
S.R. den pasado a haya condena caba pa intento di mata, posecion di arma y hopi caso di violencia. Tambe el a haci e delito aki den su tempo di prueba.
Hues a bisa cu tur esaki ta haci cu ta pone mas peso den e castigo. Hues a condena S.R. y R.d C. na 8 aña di prison. Tur e armanan y tur e balanan lo wordo destrui.
