E conexion directo nobo lo facilita acceso na servicionan specialisa, turismo medico y opcionnan di biahe pa residentenan di Aruba.
Aruba ta sigui fortifica su conectividad aereo regional cu e anuncio di un ruta di temporada nobo opera pa Wingo, cu lo conecta Aruba directamente cu e ciudad di Bucaramanga, Colombia, via Aeropuerto Internacional Palonegro.
A anuncia e ruta oficialmente dia 22 di januari y lo cuminsa opera den luna di juni 2026, te cu augustus, cu dos vuelo semanal riba diaranson y diasabra. E conexion nobo aki ta amplia e opcionnan di biahe pa e residentenan di Aruba y ta facilita e yegada di bishitantenan for di e mercado Colombiano.
Ademas di turismo, e apertura di e ruta aki ta representa un oportunidad clave pa e Rubianonan interesa pa biaha pa Bucaramanga, un ciudad reconoci den e region pa su ofertanan di turismo medico, servicionan di salud specialisa y gastonan competitivo, como tambe pa su conectividad terestre cu otro destinacionnan den otro partinan di Colombia.
“E ruta nobo aki pa Bucaramanga ta reenforsa nos vision di conectividad aereo cu no solamente ta impulsa turismo pero tambe ta responde na e necesidadnan real di nos comunidad. Facilita acceso na servicionan specialisa, cuido di salud y oportunidadnan nobo di biahe ta parti di construccion di un Aruba mas conecta, resiliente y cla pa futuro,” asina mr. Wendrick Cicilia, Minister di Turismo, Transporte y Labor a duna di conoce.
“Colaboracionnan strategico cu aerolineanan manera Wingo ta fundamental pa e desaroyo turistico di Aruba y pa fortificacion di conectividad aereo, cual tambe ta genera beneficionan directo pa nos residentenan. E apertura di e ruta aki entre Bucaramanga y Aruba ta alinea cu nos strategia di diversificacion di mercado, ta crea un oferta local na Aruba pa turismo medico, y ta amplia conectividad for di mas ciudad na Colombia. Na mes momento nos ta sigui impulsa otro mercadonan clave den region y fortifica Bogotá como hub di conexion. E tipo di iniciativanan aki ta consolida Aruba como un destinacion cercano, competitivo, bon prepara pa sirbi e huespednan di varios mercado strategico,” segun Ronella Croes, CEO di Aruba Tourism Authority.
“E adicion di e ruta di tnobo aki pa Bucaramanga ta refleha e compromiso di Aeropuerto Internacional Reina Beatrix pa sigui fortalece e conectividad aereo di Aruba. Cada vuelo nobo ta expande e oportunidadnan di mobilidad pa nos residentenan y huespednan y ta aporta na posiciona e isla como un punto di conexion strategico den e region,” asina Jo-Anne Arends, Aviation Business Development Executive di AAA, a expresa.
Di e manera aki “One Happy Island” ta reafirma su compromiso cu conectividad cu ta cumpli cu e necesidadnan di biahe diverso; turismo, salud, negoshi y experiencianan cultural y ta contribui na e dinamismo economico di e isla y di e region.
