Diahuebs mainta trempan, e ekipo di Accion di Bario cu ta consisti di DOW, Serlimar, Ploegnan di limpiesa, Bureau City Inspector hunto cu Prome Minister Mike Eman, a topa na ex Lagoon Service Station pa duna inicio na e accion di limpiesa.
Hunto a drenta Maria Christinastraat, Irenestraat, Sweelinckstraat, Beatrixstraat y Sibeliusstraat na unda e habitantenan a ricibi e ekipo di Accion di Bario cu brasa habri. E habitantenan tabata contento cu nan tambe a haya atencion pa e problematica di desperdicio den nan cayanan.
Mescos cu tur otro bario, habitantenan di Klip tambe tin e duro pa cu e prijsnan pa deshaci di desperdicio di cas cu mester di transporte. Ta trata aki di mueblesnan bieuw, stoof, frigidaire, wasmachine y tur otro sorto di artefactonan cu ya no tin uzo mas pa nan den cas, cu ta keda acumula den cura di cas te ora haya fondo of bisiñanan bin hunto pa busca un baki grandi di desperdicio pa tira esakinan afo.
Accion di Bario ta duna e habitantenan aki e sosten pa haci nan cura di cas limpi di manera cu nan tambe por biba un bida digno sin molester di insecto, y plaganan manera raton, lisimbein y djaca.
Accion di Bario su meta ademas di ta sirbi comunidad dunando un man cu limpiesa den bario, ta pa inculca e pensamento pa yuda otro cu mas tin mester.
