Humildad y obediencia ta trece crecemento spiritual y personal, ta trece amistad, bondad, bon relacion, bon karakter, ta habri porta den bida , ta drecha tur relacion, ta practica pordon, y mas cu tur cos tin un bon relacion cu Dios.
Orguyo y arogancia, ta aparta hende for di otro, ta stroba crecemento spiritual y personal,no tin respet, no ta balora amistad, no ta practica pordon, ta sirbi propio interes solamente, ta discrimina, ta practica hipocrecia, ta manipula, ta materialista, y locual ta mas pio, e relacion cu Dios ta kibra, pasobra Dios, ta odia tur locual ta orguyo ( Proverbionan 6:16-19) , pero Dios ta stima locual ta humilde.
Un persona humilde no ta nifica un persona pober, cu ta cana cu panja kibra, cu ta biba den cas kibra, esey absolutamente cu no.
Un persona humilde ta un persona di respet, cu ta stima hende , cu ta haci bon pa otro, cu tur momento e ta mesun cos, un persona cu nunca tin e conocido mal beis, no ta papia malo cu hende, tampoco placa y posicion ta susha su cabes, pasobra un hende por ta rico, decente, humilde, y cu amor pa tur hende.
Hende humilde no ta cay bao di dominio di placa, tampoco ta laga locual cu nan tin bira nan Dios, pero ta keda cu bista fiha riba Dios tur momento, pasobra nan ta reconoce Dios riba tur cos, nan ta corda for di unda Dios a saca nan, y pesey nan ta balora e amor di Dios, den nan bida, y nan ta keda humilde, pasobra nan sa cu sin Dios nan no ta nada.
Bo ta papia malo di un hende humilde, bo por traha trampa pe, por hari tras di su lomba, bo por trata di strobe di logra algo, pero bo no ta bay logra, pasobra humildad ta vence maldad tur momento, mescos cu Cristo a vence mundo.
Dios ta resisti e orguyosonan,ma ta duna gracia na e humildenan.Humiya boso mes anto bao di e man poderoso di Dios, pa E por halsa boso na e tempo apropia. ( 1 Pedro 5:5-6).
Den humildad tin bon crecemento y tin un curason cu ta agrada Dios, pasobra pa medio di humildad hende ta crece den nan trabao, ta crece den e obra di Dios, ta ricibi gracia di Dios, y ta ricibi bondad for di man di hende cu Dios mes ta pone den nan caminda.
Pasobra ken cu halsa su mes lo wordo humiya,y esun cu humiya su mes lo wordo halsa.
Nunca permiti bo estudio, bo posicion, pone bo halsa bo mes, y hasta lubida riba bo grandinan, for di e cas cu bo a sali, y ken ta esnan cu a sostene bo, no laga posicion temporal susha bo cabes,pasobra den bo humildad, lo bo cosecha mas cu den bo rikesa, pasobra amor di Dios ta permanece cu hende humilde, mientras cu e Spirito di Dios ta aparta for di hende orguyoso.( 1 Samuel 16:13-14).
Den orguyo y arogancia, hende ta perde hopi cos, pasobra un spirito malo ta bini riba nan, y nan ta reta Dios mes,nan ta perde temor di Dios, y ta cuminsa kere den poder humano, poder di bruheria, poder di placa, poder di manipulacion, y nan ta lubida cu Dios ta Todopoderoso, y den man di Dios nos tur ta, y cu ta Dios ta kita y Dios ta pone.
Awor ta e tempo pa nos sinja nos hobennan y tur otro hende cu ta kere den nan orguyo, cu hende mester ta humilde, pa asina agrada Dios tur momento.
Sinceramente, Pastor Marcel Balootje
