Autoridadnan di Nashville (Tennessee, Merca) a wordo adverti aña pasa du Anthony Quinn Warner – e unico autor di e explosion cu a sacudi e centro di e ciudad e mainta di e dia di Pasco – tabata fabricando bom.
Segun un informe di polis local, publica diamars pa The Tennessean, pareha di e sospechoso a avisa dia 21 di augustus di 2019 na agentenan, cu e homber “tabata elaborndo dispositivonan explosivo den e trailer di nan cas.”
Ora cu oficialnan a yega na cas di e muhe, nan a hay’e sinta den e vernda cu dos arma descarga bana di dje.
“El a bisa cu e armanan tabata pertenece na un tal Tony Warner y cu ya e no tabata kier’e mas den cas,” Don Aaron, vocero di e Departamento di Polis Metropolitano di Nashville a detaya.
Ademas, e documento a indica cu e abogado di e muhe, Raymond Throckmorton III, a bisa e oficialnan cu Warner “cu frecuencia tabata papia di militarnan y di fabricacion di explosivonan” y a agrega cu e homber “tabata sa kico e ta haci y tabata capaz di traha un bom.”
Sin embargo, ora cu e agentenan a yega na e vivienda di Warren, su caravan tabata cera y ningun hende a responde y un posterior solicitud pa registra su propiedad a wordo nenga.
“Nan no a mira ningun evidencia di un crimen y no tabata tin autoridad pa drenta den su cas of propiedad cera,” Aaron a sigura.
Despues, Polis a pasa tur e informacion na FBI y e Departamento di Alcohol, Tabaco, Armanan di Candela y Explosivo di Merca.
“FBI a informa cu nan a revisa su propiedadnan y no a haya ningun prueba contra Warnet,” e oficial a splica y a agrega cu e Departamento di Defensa di Merca tambe a comunica na augustus di 2019 cu e pruebanan contra di e sospechoso tabata “negativo.”
“Den ningun momento a detecta pruebanan di un delito y no a tuma medidanan adicional,” Aaron a bisa.
“Ningun informacion adicional riba Warner a yega na e atencion di e departamento of di FBI despues di augustus di 2019,” el a agrega.
Ta kere cu Anthony Quinn Warner, di 63 aña, a explota dia 25 di december su autocaravan, carga cu explosivo, heridando por lo menos 3 persona y dañando decenas di edificio rond.
Di acuerdo cu autoridadnan, e sospechoso a fayece den e explosion.
