Minister di Deporte, mr. Gerlien Croes, ta anuncia cu e instalacion di luznan LED na veld di River Plate a keda oficialisa y culmina exitosamente y cu e veld awe ta completamente ilumina cu luznan LED. E entrega di e proyecto aki ta marca un otro logro den e plan structural pa mehora infrastructura deportivo na Aruba.
E instalacion di luznan LED na veld di River Plate ta forma parti di e proyecto di iluminacion financia pa Lotto pa Deporte, cu como meta pa crea espacionan deportivo mas sigur, sostenibel, accesibel y funcional pa entrenamento y competencia, tanto pa clubnan como pa comunidad, specialmente nos muchanan y hobennan di presente y futuro.
Minister Gerlien Croes a expresa su satisfaccion cu e resultado di e trabou y a felicita tur esnan cu a contribui na e realisacion di e proyecto: “Pabien na River Plate. Esaki ta un paso concreto pa sigui move deporte na Aruba”.
Minister Gerlien Croes a confirma tambe cu veld di RCA ta e siguiente veld riba e lista pa ricibi luznan LED den marco di e mesun proyecto di iluminacion, demostrando cu e programa ta sigui progresando manera planifica.
Danki na tur partners y tambe stakeholders di sector priva cu ta duna nan aporte y yuda sigui inverti den e futuro y formacion di nos pais.
