Diabierna mainta, Minister mr. Wendrick Cicilia conhuntamente cu Minister Geoffrey Wever compaña pa Ronella Croes, CEO di ATA y Elton Arends di Oranjestad Investment Group a anuncia un proyecto pa Oranjestad. Pa Gobierno di Aruba ta un placer pa anuncia un proyecto di camara di siguridad den Caya Grandi, esaki ta un necesidad y awe por anuncia cu e ta bira realidad
Lo aloca e camaranan di siguridad den areanan stretegico, pasobra esaki ta cubri e necesidadnan cu tin n’e momentonan aki. Den programa di gobernacion di Gabinete AVP-Futuro, Oranjestad y San Nicolas ta importante pa di e manera aki crea oportunidadnan nobo.
Lo instala un total di 43 camara di siguridad y 10 speaker tambe. Ta importante pa resalta e colaboracion cu tin entre sector publico y sector priva. Oranjestad Investment Group ta consisti di un grupo di inversionistanan motiva pa revitalisa nos centro di ciudad. Ya caba por mira diferente movecion den area di Oranjestad.
Pa Minister Wendrick Cicilia ta un placer di por colabora conhuntamente cu Minister Geoffrey Wever, Oranjestad Investment Group y Aruba Tourism Authority pa sostene proyectonan cu tin un balor positivo. “Un di nos misionnan ta pa nos centro di ciudad bira un atraccion turistico, pa asina nos turistanan por disfruta di e experiencianan cu e comerciantenan tin pa ofrece”, Minister Cicilia a expresa.
E camaranan di siguridad lo contribui na e sentido di trankilidad cerca nos comerciantenan y eleva nos centro di ciudad.
23 di januari 2026
