Fortalesa pa Famia, ta Cristo Hesus, ta e poder di Dios cu nos tur mester, ta e gracia di Dios, cu ta rondona nos bida cu amor, sabiduria, misericordia, compasion, pasobra ta den Cristo Hesus nos tin tur cos.
Tin hopi situacion den bida, cu por presenta cu nos tin mester di yudansa y pronto auxilio di Dios, pesey ta masha importante nos corda riba su promesanan. Pasobra promesanan di Dios ta fiel y berdadero, y nan ta duna na tur hende, especialmente esnan cu berdaderamente ta kere den Su palabra, y Su promesa.
E palabra di Dios ta carga e presencia di Dios, pesey ora nos kere den su promesa e cos lo sosode pasobra Dios nunca ta tarda y su misericordia ta grandi.
Un promesa grandi di Dios ta para scirbi den Isaias 41:10 cual ta bisa lo siguiente:
No tene miedo, pasobra Mi ta cu bo,no desmaya pasobra Mi ta bo Dios.
Lo Mi fortalese bo, si lo Mi yudabo, si lo Mi sostenebo cu Mi man drechi di husticia.
Locual nos tin di compronde, cu cualkier situacion cu nos por hanja nos mes aden, Dios ta mas grandi cu e situacion.
Cualkier palabra di hende,cualkier resultado, cualkier problema, cualkier menasa, cualkier dolor, cualkier traicion, cualkier strobacion, cualkier ofensa, si nan por ganja riba bo, lanta falso testimonio, calumnia, intriga y hasta pone bo bida na peliger, nos Dios ta soberano riba tur situacion.
Ora e rey a bisa Daniel cu e ta wordo tira den cueba di leon, Daniel a sigi haci oracion , pasobra e tabata sa cu su Dios ta Soberano riba e situacion.
Ora rey Ezequias a hanja e carta di e rey di Siria Senaquerib, e no a hansha su bida e a hiba e carta den tempel dilanti di Dios, y Dios a sali na su denfensa.
Por ta awe bo por hanja bo den un situacion, y bo a keda para bo so, por fabor no desmaya, corda cu nos Dios ta maraviyoso y e tin tur cos den su man y Dios tin e ultimo palabra.
E ta esun cu ta saca bo for di den candela, y pa duna bo experiencia di bida cu bo tin cu reconoce , si no tabata pa Dios , awe lo ta otro asunto, pasobra Dios su man ta poderoso.
Cu confiansa den Dios, nos lo mira Dios su man move y milager ta sosode pa esnan cu ta kere, pasobra pa Dios nada ta imposibel.
Bin serca Mi tur cu ta cansa y carga y lo Mi duna boso sosiego, ( Mateo 11:28). Hesus ta demostra aki cu E ta fuente di yudansa, e caminda di berdad y e bida, caminda tur hende por yega y ricibi sosiego, nunca Cristo Hesus a exclui ningun hende.
E a bisa pa tur hende bin serca dje, pero locual cu hopi no kier reconoce ta cu pica ta cansa hende, e peso di pica ta hopi fuerte y doloroso, pero bao di enganjo di diabel, hopi ta siego, no ta mira, y tampoco no kier tende.
Y den nan orguyo, inmoralidad y arogancia , nan na rechasa e palabra, sin tene cuenta cu ta Dios nan ta rechasa.
No desmaya , trankilisa, Senjor ta nos wardador, Senjor ta nos Baranca fuerte, Senor ta nos refugio y nos fortalesa, Senor ta nos wardador.
Mescos cu E a habri Laman Corra pa e pueblo di Israel por a crusa, awe E por habri cualkier porta den bo bida y yuda bo den cualkier necesidad.
No desmaya, no entrega, Dios ta grandi, y Todopoderoso.
Sinceramente, Pastor Marcel Balootje
