Diasabra un grupo di famia di victimanan, amigo y ciudadano preocupa a entrega oficialmente un manifesto na Parlamento di Aruba, pidiendo accion legislativo concreto contra hit & run, stuurmento bou influencia y di manera iresponsabel. Presidente di Parlamento di Aruba, Sr. Marlon Sneek, hunto cu, entre otro, coleganan di fraccion di AVP a ricibi e manifesto.
E entrega di e manifesto ta marca un momento importante den e lucha pa un trafico mas sigur na Aruba. E documento, respalda pa mas cu shete mil firma, ta refleha e preocupacion y dolor cu e comunidad ta sinti, y alabes e urgencia pa fortalece e cuadro legal pa preveni mas tragedia.
Publicacion di AVP riba social media ta indica cu: “E mas cu shete mil firma cu a ricibi awe ta suma na e otro esfuerzonan cu Parlamento ya a encamina pa pronto por aproba un cambio di ley cu lo por yuda den e prevencion di casonan di Hit & Run door di ahusta e castigo. E siguiente fase den e proceso lo por ta cla den un luna, pa despues sigui su caminda.”
Miembronan di Fraccion di AVP individualmente a dialoga cu e manifestantenan tanto prome y despues di e entrega di e manifesto. Durante e combersacionnan, nan a expresa nan simpatia pa e causa, a contesta preguntanan y a reafirma nan compromiso pa traha na resultado concreto den e asunto.
Fraccion di AVP a subraya cu esaki no ta un tema partidario, sino un asunto di siguridad publico y husticia social. E fraccion ta cla pa duna e ehempel di crusa liña partidario pa logra tur cambio legal necesario, cu e meta di crea un enfoke mas efectivo y riguroso pa garantisa un ambiente di trafico mas safe pa tur hende na Aruba.
Fraccion di AVP lo sigui traha activamente den Parlamento pa transforma e deseo di comunidad den accion legislativo concreto, cu respet pa e victimanan y cu responsabilidad pa generacionnan presente y futuro.
