Manera mi a trece dilanti den e prome parti di e articulo, e “Bon Comun” no ta algo cu por wordo entrega for di ariba pero si algo cu por wordo crea hunto door relacionan humano, combersacionan y accionan comparti. Den e di dos parti aki nos kier pone enfasis riba algun principio fundamental cu Block ta menciona den su buki cu ta necesario pa por “Activa” e Bon Comun.
Principionan clave di e Bon Comun
Block ta subraya cu nos ta “cocreador” y no consumidor. E bienestar colectivo por origina ora cu personanan ta participa activamente den bida comunitario. Ta enfatisa cu crea/establece relacion ta e base pa cambio. E confiansa y vinculo entre e ser humano ta elementonan mucho mas decisivo cu structuranan existente of politica. Adicionalmente ta subraya cu accionan local tin importancia. Cambionan duradero tin tendencia di inicia den nos bida diario. Tambe ta wordo poni hopi enfasis riba hiba conversacionan. Block ta señala tambe cu tene conversacion ta crea posibilidadnan nobo. Por ehempel scucha y dialoga ta permitibo descubri balornan comparti cu formanan nobo pa actua den colectividad. Den liña cora ta trece dilanti cu e responsabilidad mester ta uno comparti. E “Bon Comun” ta rekeri compromiso y no delegacion.
Un concepto central den su buki ta “activismo relacional”. Contrario na activismo tradicional cu ta basa riba protesta, campaña of confrontacion, e enfoke di activismo relacional ta crea y mantene relacionan di balor. E tipo di activismo aki ta basa su mes riba reunion cu ciudadanonan pa combersa riba loke realmente ta importante pa nan, explora posibilidadnan y asumi compromisonan colectivo. Otro aspecto di activismo relacional ta pa genera espacio unda cu ta cultiva confiansa, coresponsabilidad y un accion colectivo (y no pa purba na convence of impone solucionan).
Loke ta destaca como caracteristicanan di activismo relacional ta por ehempel encuentronan chikito y personal. Mi mes ta pensa cu kinan ta unda por crea mas involucracion cu pueblo y e hende ta wordo scucha. Den activismo relacional preguntanan y posibilidadnan dirigi riba futuro ta hunga un rol. Accionan basa riba compromiso y e dignidad di cada participante ta central. Block ta extende su analisis riba diferente tereno di e bida social. E ta señala cu periodismo por contribui na e Bon Comun door di conta/publica storianan di cooperacion, speransa y no solamente di conflicto of negativismo. Tambe Block ta enfatisa cu arkitectura y espacionan publico tambe por contribui na e Bon Comun si nan wordo diseña pa fomenta encuentro y interaccion entre ciudadanonan. Loke ta remarcabel ta cu e tambe ta menciona e rol di economia local, algo cu nos a trece dilanti den e articulo “un economia di speransa”. Bo ta wak claramente un conexion entre e economia di speransa como vision di Balkenende y e perspectiva di Block, cual un economia local por orienta su mes mas riba e balor social pero tambe comunitario y no solamente pe beneficio financiero. Pa conclui, Block tambe ta toca e tema di liderasgo (mescos cu Verbrugge). Enfasis mester wordo poni riba controla menos y facilita pueblo mas. Tambe e liderasgo mester por convoca y sostene combersacionan significativo.
Nos ta spera cu e serie di articulonan aki tocante diferente perspectiva di diferente autor por a cai na agrado y intriga ciudadanonan pa forma parti di e conferencia di e Bon Comun cu lo tuma lugar 29 y 30 januari. E expectativa ta cu e conferencia lo ta un impulso pa nos ciudadanonan ta mucho mas comprometi cu e “Common Good” di nos pais.
