E entusiasmo entre e comerciantenan di Caya Grandi ta keda halto despues di anuncio di e proximo edicion di Ban Bek Caya. E ultimo evento a mustra atrobe cu e iniciativa a duna resultado positivo, cu varios comerciante cu a participa cu ofertanan y promocionnan atractivo, resultando den bon benta y hopi movecion den centro di ciudad.
Ban Bek Caya ta un iniciativa di Gabinete AVP–Futuro cu e meta pa trece bida bek den Caya Grandi y duna un impulso economico na e comerciantenan estableci den e zona. Cada edicion ta bira mas grandi, y e efecto positivo ta bira mas visibel pa tur partner envolvi.
Edicion aki lo ta un manifestacion cultural cu realse riba e Bon Comun colectivo. Ademas cu lo haci un invitacion na tur nos bishitantenan, lo inclui tambe oradornan presente riba nos ilsa pa e Expo y Conferencia Common Good pa forma parti di e evento aki den centro di nos ciudad.
Durante e ultimo edicion, hopi persona a probecha di e orario y e ambiente festivo pa haci nan compras y disfruta di e bon ofertanan cu mayoria di comerciante a presenta. Diferente tienda a prepara nan mes pa brinda un miho experencia na cliente, adaptando nan local y creando espacio parti pafo pa sinta, come y disfruta di ambiente y famia den centro di ciudad.
Entre e comerciante y organisacionnan cu a participa, a registra feedback hopi positivo di representantenan di Penha, Dufry, SportStar, Watapana Dance Company, Mint Lime & Beans y Old Dutch Pastry, pa menciona algun. Nan a comparti cu e espectativa y e resultado di benta a supera loke tabata spera pa e anochi di e actividad.
Algun comerciante ta tuma iniciativa cu promocion creativo, manera special cake baskets, booth cu hasta 50% di descuento, demostracionnan, inscripcion pa grupo di baile, terasa cu ambiente festivo y otro actividatnan cu ta atrae bishitante.
E comerciantenan ta mira atras riba un dia exitoso di benta, contento cu e movecion y e fluho di clientenan, incluso clientenan cu a bolbe e dia siguiente pa sigui cu nan shopping. Nan ta expresa nan gradisimiento na Gobierno di Aruba y tur partner envolvi pa e esfuerso pa trece hende bek den caya y empuha comercio den Caya Grandi.
E comunidad ta invita pa e prome edicion di Ban Bek Caya pa 2026, cu lo tuma luga diabierna 30 di januari, di 6:00 pm te 10:00 pm. Un anochi di compras, ambiente, cuminda y convivencia den centro di ciudad.
