Den marco di e Common Good Conference cu ta tuma luga e siman aki, diferente fundacion riba Aruba ta comparti con nan ta pone e concepto di bon comun na practica. Un di nan ta Foundation for the Development and Psychosocial Empowerment, un fundacion cu ta enfoca riba empoderamento sosial, bienestar mental y consciencia ambiental.
Segun e directora di e fundacion, Janine, nan ta traha cu un modelo innovador pa medio di nan Programa Natura, un programa hybrid cu ta conecta iniciativanan social cu sector priva. Pa medio di colaboracion cu companianan, manera Radisson Blu, e fundacion ta logra ofrece sesionnan gratis na comunidad, mientras cu e programa ta keda autosostenibel.
“Ta un manera di haci cu nos programa y nos fundashon ta keda autosostenibel, mientras nos ta hiba common good bek na comunidad,” ta locual Janine a bisa durante su entrevista.
E Programa Natura no solamente ta enfoca riba bienestar psicosocial, pero tambe riba consciencia pa cuida naturalesa y cuida nos mes, cu e meta pa preserva Aruba pa generacionnan futuro. Den e vision di e fundacion, e bon comun no ta algo individual, sino un responsabilidad colectivo cu ta rekeri colaboracion entre organisacion, compania y comunidad.
Pa medio di e Common Good Conference y Expo, e fundacion ta spera inspira otro organisacion pa mira cu ta posibel crea modelo nobo cu ta sostenibel y cu ta sirbi sociedad den su totalidad.
E fundacion a uza e oportunidad pa invita e comunidad pa participa na e Common Good Conference riba 29 y 30 di januari, unda tur hende ta bonbini pa comparti, siña y inspira otro pa sigui traha pa un Aruba mas fuerte, mas consciente y mas solidario.
