Como parti di e Common Good Conference y Expo di e siman aki, diferente fundacion riba Aruba ta comparti con nan ta traha pa fortalece e bon comun. Un di nan ta Club Kibrahacha, un fundacion cu ta enfoca riba bienestar social, mental y fisico di adulto mayor.
Segun su directora, Janely Nicolas, Club Kibrahacha ta ofrece un centro di encuentro di dia pa adulto mayor, caminda nan por participa den diferente actividad cu ta stimula interaccion social, movemento y combersacion. E obhetivo principal ta pa preveni soledad y deterioro mental y fisico, manteniendo adultonan mayor activo y conecta cu otro.
“Nos ta crea un espacio caminda adultonan mayor por sali for di cas, topa cu otro, y keda activo mental y fisicamente,” e directora a bisa.
Cu e embehecimento rapido di poblacion riba Aruba, e fundacion ta destaca cu e rol di organisacionnan cu ta traha cu adulto mayor ta bira cada dia mas importante. Segun e fundacion, actividad social regular ta esencial pa evita aislamento y pa prolonga independencia y calidad di bida.
Club Kibrahacha ta mira e Common Good Expo como un oportunidad clave pa mustra nan trabou y pa fortalece colaboracion cu otro fundacion, departamento gubernamental y sector priva. Nan ta enfoca riba crea mas conexion y sosten cu companianan cu kier contribui na bienestar di adulto mayor riba Aruba.
“Nos ta spera cu mas fundacion y compania lo uni cu nos pa fortalece e sosten pa adulto mayor,” segun Nicolas.
E fundacion ta invita e comunidad, otro fundacion y compania pa participa na Common Good Expo riba 29 di januari, cu lo tuma luga di 12:00 pm te 8:00 pm na Renaissance Wind Creek Convention Center. Un oportunidad pa conoce mas riba e iniciativa, conecta y contribui na un Aruba, caminda dignidad y bienestar pa adulto mayor ta central.
