Cas di Cultura ta lansa oficialmente Adopt-a-Chair, e prome iniciativa publico pa recauda fondo bou di e campaña di renobacion; E Brasa, invitando comunidad pa tuma parti na e renobacion di Cas di Cultura, e teatro nacional di Aruba.
Cas di Cultura pa hopi tempo ta funciona como un luga cultural pa presentacionnan, educacion y encuentronan di comunidad. Pa medio di e renobacion, E Brasa, e organisacion ta trahando pa modernisa su facilidadnan mientras ta conserva e animo y herencia cu generacionnan di Arubiano a lanta cune. E campaña ta enfatisa propiedad colectivo di cultura y ta encurasha participacion publico.
E renobacion E Brasa ya caba a ricibi sosten importante di Gobierno di Aruba, y partnernan di sector priva. E contribucionnan aki a yuda pone un fundeshi fuerte pa e proyecto. E iniciativa Adopt-a-Chair awor ta habri e porta pa comunidad en general tuma parti y laga un marca visibel riba e futuro di Cas di Cultura.
E iniciativa Adopt-a-Chair ta permiti individual y famianan pa contribui directamente na e renobacion door di adopta un asiento den e teater renoba. Lo ricibi reconocemento visual a traves di un plachi di nomber pone na e parti patras di un stoel di teater pa un periodo di 10 aña, simbolisando nan contribucion na futuro di Cas di Cultura. Adopta un stoel no ta nifica propiedad di e asiento, pero mas bien ta sirbi como un reconocemento duradero di sosten.
E campaña ta ofrece tres nivel di participacion:
- Stoel di asiento general, incluyendo un certificado di aprecio
- Best seats of the house (meimei, prome tres filanan), incluyendo un certificado y un tour personalisa di e facilidad dirigi pa e director
- Asiento VIP riba balcon, incluyendo un certificado y un tour personalisa di e facilidad dirigi pa e director
UN DEDICACION PERSONAL
“Cada stoel adopta ta representa un paso mas cerca di reapertura di nos portanan y yama e comunidad bon bini bek den un espacio renoba,” asina Vicky Arens, directora di Cas di Cultura a bisa. “Nos a haya individualnan cu a dedica nan stoel na un ser keri cu a fayece, y tambe dedicacionnan di mayornan na nan yiu muhernan cu ta baila ballet riba escenario di Cas di Cultura. E ta un medio bunita pa pone un toke personal na un pida asina importante di herencia di Aruba.”
Adopt-a-Chair ta diseñá pa ta accesibel, y significante pa comunidad, reforsando e mensahe cu Cas di Cultura ta di tur hende. Fondonan recauda pa medio di e iniciativa aki lo sostene directamente e esfuersonan di renobacion cu ta andando bou di e campaña E Brasa.
E lansamento di Adopt-a-Chair ta wordo sostene pa un esfuerso di conscientisacion publico, incluyendo un jingle y updates riba medionan social cu lo destaca e treyecto di e renobacion y su impacto.
Miembronan di publico ta wordo encurasha pa sigui Cas di Cultura online pa haya sa mas di e renobacion di E Brasa y con pa participa den e campaña Adopt-a-Chair.
Tocante Cas di Cultura
Cas di Cultura ta e teatro nacional di Aruba ofreciendo espacio pa presentacionnan, educacion, exposicionnan, y eventonan comunitario. Pa medio di e renobacion di E Brasa, Cas di Cultura tin como meta pa sigura cu e teatro ta sigui sirbi futuro generacionnan.
Pa mas informacion:
Yama nos na 582-1010 of email nos via info@casdicultura.aw of check nos website www.casdicultura.aw pa detaye riba e campaña Adopt-a-Chair y otro maneranan pa sostene e renobacion di E Brasa.
