Minister Wyatt Ras tawata den parlamento pa un reunion publico pa atende e retonan cu tin den cuido pa nos adultonan mayor. Durante e reunion aki parlamentario Dangui Oduber a trece dilanti tur e proyectonan cu ministerio di salud a laga atras y a wordo para pa actual minister Wyatt Ras. Un situacion penoso y condenabel pasobra ta placa di pueblo a wordo uza pa tur e proyectonan aki, ta pueblo a paga pa nan pa asina nos por tin un mihor calidad di cuido y servicio.
Proyectonan pa digitalisa area di cuido a keda poni un banda
Practicamente tur Proyecto cu ta na beneficio di pueblo a wordo poni un banda. Tawata tin e Proyecto di Aruba Health App cual e meta tawata pa digitalisa henter e sector di cuido medico. Un Proyecto cu a wordo prepara y diseña pa ministerio di salud, Setar N.V. y AZV cual sigur ta partnernan hopi respeta den comunidad. Nos ta papia aki di profesionalnan cu conocemento cu a traha riba e proyecto aki. Hasta e prome fase cu ta haci afspraak digital via Aruba Health app na dokternan di cas a wordo lansa pendiente e siguente fasenan. Un proyecto cu lo mester a percura pa organisa y structura henter e sector di cuido hacienda uzo di innovacion y tecnologia. E proyecto aki lamentablemente a wordo para y e minister Wyatt Ras no a bin cu nada otro tampoco pa reemplasa. Ora bo ta para un proyecto at least bo lo mester tin e vision pa reemplasa e proyecto cu un otro pero den e caso aki no tawata tin nada.
Proyecto pa supervision di Vacation Rentals
A laga un proyecto pa regula vacation rentals y mester a privatisa Dienst warenkeuring hygiene. Ta hopi placa a wordo inverti den e proyecto aki pa asina tin control y supervision di vacation rentals pa crea un level playing field. Esaki ta un otro proyecto cu a wordo para y poni un banda y atrobe no tin nada pa reemplasa esaki mientras tin free for all den vacation rentals.
Zorgakkoord ta spoorloos
A firma un zorgakkoord cu tawata tin un acuerdo di cuido medico cu tur stakeholder di cuido medico a firma pa asina determina e rumbo y direccion den cuido medico na Aruba. E tempo ey te hasta actual miembro di parlamento y lider di fraccion di Futuro sr Gino Goeloe a firma e acuerdo di cuido aki como director di wit gele kruis. Te dia di awe, despues di mas di 10 luna di gobernacion parlamento no a haya un update di e avancenan di e zorgakkoord.
Den stoel di parlamentario el a critica y awo den stoel di Minister e no ta goberna
Minister Wyatt Ras a resulta un despunto grandi. Apesar di su experiencia y a sinta 25 aña den parlamento awor cu e la haya chens pa goberna el a demostra cu e ta incapas pa lidera. Mi no ta bisa cu e mester ta di acuerdo cu tur e proyectonan cu Gabinete Wever-Croes a laga atras, pero si e ta scoge pa para un proyecto e mester splica e motibo dicon, y splica kico ta bay bin na lugar di e proyecto. Asina aki ta placa di pueblo ta bay benta afo pa capricho politico. E no tin maneho, e no tin vision y mucho menos liderazgo. Aruba merece hopi mas mihor pa cuido medico!
