Cu hopi asombro mes y kisas nos por considera hasta chistoso loke nos por a tuma nota di e reciente desesperacion di fraccion di MEP, cu diripiente nan tematica awor a para bira di ta enfoca riba e refineria.
Despues cu awor nan a realisa cu pueblo no a kere den nan mentiranan y instigacion contra e Rijkswet HOFA, ata nan awor despues di e acontecimentonan geopolítico entre Venezuela y Estados Unidos dia 3 di januari ultimo y e reunion cu Presidente di Merca tabatin cu algun empresa petrolero grandi, nan a tuma esaki brasa habri como un oportunidad nobo pa atrobe bin manipula nos pueblo cu promesanan falso y mentiranan cu anan si ta pro-pa un reapertura di e refineria.
Nada straño cu atrobe nan lo bay organisa un caminata y bay dilanti di e refineria cu un accion di Ora Cero, Parti 2.
Fraccion di AVP tambe tabata y ta pro pa habri un debate riba e tematica aki y na unda cu a exigi di gobierno pa splica na palabra cla y raspa, pa di un bes pueblo haya sa kico en realidad tabata e motibo cu e gobierno di MEP/POR/RED a tuma e decision descabeya di bay over na laga disolve e contrato cu tabatin entre Citgo y Refineria di Aruba y asina tambe laga cera e refineria definitivamente y hasta a duna CITGO carte blanche pa get away cu e claim di mas di 175.000.000 dollar (mas di 300 miyon florin).
E acto criminal aki contra e refineria a tuma lugar durante un reunion publico di parlamento di 9 april 2020, uzando excuus di e pandemia, pa manera ‘ladronnan di anochi’ haya aprobacion di parlamento pa bay haya carte blanche pa dicho decision.
CITGO su compania mama na Merca y no na Venezuela, esta PDV Holding Inc. tabata suficiente solido pa por a cumpli y para pa tur e garantianan cu e contract entre CITGO y Refineria di Aruba tabatin stipula. CITGO Group, den su totalidad, y na unda cu CITGO Aruba tabata cay bao di esaki tambe, na juni 2019 tabata dispone di mas di
1.36 biyon dollar. Awor diripiente fraccion di MEP ta basa su mes cu a tuma e direccion di bay over na termina e acuerdo entre CITGO y RDA (Termination agreement) debi cu den e contrato entre CITGO y RDA, esta e Participation Agreement tin un clausula, den caso di un “Force Majeur”, tur dos partido ta keda libra for di e contract.
Esaki ta locual esunnan di MEP ta bisa, pero den e caso aki, manera ya menciona cu PDV Holding na 2019 tabata dispone mas di 1.36 biyon dollar. Anto aki e pregunta cu ta bin dilanti ta: dicon no a haci ni e mas mínimo esfuerzo pa bay tras di PDV Holding pa cu incumplimento di acuerdo y exigi e suma di garantia, esta e 175 miyon dollar di e claim ambiental.
Pero aki ta conclui cu tabatin motibonan scur tras di e decision di Gabinete Wever-Croes, esta e gobierno di MEP/POR/RED. Anto awe e fraccion di MEP tin e pudor di bin haci comosifuera cu ta anan lo ta bay ta e salbado di e refineria. Manera e famoso dicho ta bisa: “Het kan verkeren”.
Echo ta cu Gabinete Wever-Croes I a bin haya e Refineria CITGO operando cu mas di 700 yiu di tera laborando den aden! Pregunta ta keda: Ta ken of cua compania(nan) a beneficia cu e plan y echo macabro aki?
