Anticipando e expo y conferencia diahuebs y diabierna di e Bon Comun, diferente fundacion na Aruba ta comparti con nan ta pone e bon comun den practica cada dia. Un di nan ta Fundacion FUNARI, un fundacion cu ta traha na bienestar di persona cu limitacion fisico.
Segun Brenda Rasmijn Maduro di Fundacion FUNARI, un di e retonan mas grandi pa un persona cu limitacion fisico ta mobilidad y acceso na bida social. FUNARI ta responde na e reto aki pa medio di transporte special y un programa amplio di actividad cu ta permiti clientenan sali for di cas, participa den sociedad y sigui disfruta di bida.
“Nos ta uza transporte special pa duna nos clientenan e posibilidad pa yega tur caminda y participa activamente den bida social y diario,” Rasmijn Maduro a expresa.
Pa FUNARI, inclusion no ta solamente cuido fisico, pero tambe participacion social, conexion humano y calidad di bida. E fundacion ta ofrece diferente actividad pa stimula independencia, bienestar emocional y sentido di pertenencia.
E Common Good Conference y Expo ta mira como un oportunidad importante pa mustra e trabou cu fundacionnan ta haci na Aruba y pa fortalece colaboracion entre organisacionnan. Segun FUNARI, ora fundacionnan bin hunto, nan por comparti reto, solucion y crece mas fuerte como un comunidad uni.
“Ora nos bin hunto, nos ta bira mas fuerte. Union ta haci forsa,” segun e representante.
Fundacion FUNARI ta invita e comunidad pa no perde e oportunidad pa conoce mas di e iniciativa di bon comun na Aruba durante e Common Good Expo riba 29 di januari, na Renaissance Wind Creek Convention Center. Un oportunidad na unda tur fundacion ta presente, compartiendo nan mision y demostrando cu huntu, Aruba por sigui crece den inclusion, dignidad y solidaridad.
