E tristo realidad riba nos camindanan
Den bista di e situacion preocupante di e ultimo simannan den nos trafico, como parlamentario mi kier lansa un yamada fuerte na henter e comunidad di Aruba. Cu un cifra di 11 morto fatal den trafico pa aña 2025 y pa e aña aki caba 3 morto fatal, e situacion riba nos camindanan ta birando un crisis cu mester di nos atencion y sigur ta rekeri di un cambio di conducta inmediato di nos banda. Recientemente Minister di Husticia tabata den Parlamento y segun cifranan oficial, e cantidad di “hit and run” a mira un aumento drastico den e ultimo añanan:
- 2020: 559 caso
- 2021: 1000 caso
- 2022: 757 caso
- 2023: 902 caso
- 2024: 1093 caso
- 2025: Cifranan preliminar ta indica cu e aña lo a surpasa 2024.
A trata e cifranan aki specificamente mirando e sucedidonan di hit and run na final y comienso di aña cu a conduci na morto. E informacion aki no ta djis un cifra mas; ta trata di bidanan perdi, famianan den luto y un tristesa pa nos sociedad. E cifranan aki ta confirma un crisis di moral y responsabilidad riba nos camindanan. Sigur mi mester expresa mi preocupacion pasobra e cifranan aki ta indica un tendencia alarmante y inacceptabel den nos trafico.
Controlnan ta necesario, pero concientisacion ta clave
Mirando e realidad den trafico, susedidonan, temporada di Carnaval Cuerpo Policial a intensiva nan control preventivo. E resultadonan di e controlnan recien di Cuerpo Policial (KPA) na Oranjestad ta hala atencion. Den dos anochi so, a reparti mas di 150 boet pa infraccionnan manera velocidad halto, falta di faha di seguridad y falta di documento.
E hecho cu polis mester reparti asina hopi boet den un solo anochi ta un indicacion cu hopi di nos no ta tumando e reglanan na serio. Controlnan policial lo sigui y nan ta esencial, pero na mi opinion nos no por tin un polis tras di cada auto. E siguridad mester cuminsa den e curason y e consenshi di cada chauffeur.
Percura pa un trafico sigur ta responsabilidad di nos tur
E meta di un trafico sigur ta rekeri pa nos cambia nos mentalidad:
- Si bo ta bebe, no stuur!
- Si bo ta bay bebe, fix bo #BAR of amigo DIDI!
- Pone bo celular un banda ora bo ta stuur
- Mantene bo mes na e velocidad maximo riba caminda
- y cumpli cu tur demas reglanan di trafico.
Cumpli cu regla no ta costa nos nada, pero e balor cu e tin ta impagabel: e por salba bida!
Un yamada pa union y responsabilidad
Pa conclui mi ta pidi pa nos uni como pueblo. Nos mester para e ola di negativismo y desgracia. Ban biba cu mas respet pa otro riba caminda. Aruba ta mucho chikito pa nos sigui perde bida pa motibo di actonan descabeya. Mi ta haci un yamada na cada mayor, cada hoben y cada ciudadano: ban uni pa un trafico mas sigur. No sea parti di e estadistica negativo aki. Ban percura pa Aruba sea un isla caminda nos ta cuida otro riba caminda.
