Aruba ta preparando pa un evento di gran importancia pa nos comunidad: e Common Good Expo, un expo unico cu ta trece mas cu 50 booths di fundacionnan y organisacionnan di tur ramo hunto, cu ya a ta activo pa hopi aña naAruba y cu ta trahando cu e mesun ideal: e balor comun y bienestar di comunidad. E Common Good Expo ta tuma luga diahuebs dia 29 di januari na Renaissance Wind Creek Convention Center cuminsando for di 2’or di atardi pa 8’or di anochi.
E Common Good Expo no ta simplemente un expo, e ta un plataforma caminda compromiso, cooperacion y accion social ta bay man den man. E fundacionnan cu ta participa ta representa diferente sector manera salud, educacion, medio ambiente, desarroyo social, cultura y apoyo comunitario. Nan trabou continuo ta yuda fortifica e cohesion social na Aruba y ta crea impacto real den bida di hopi hende.
Den un tempo caminda desafionan social y economico ta aumenta, e Common Good Expo ta mustra con cooperacion y motivacion pa e bon comun por crea solucionnan sostenibel. E expo ta ofrece un oportunidad pa comunidad conecta directamente cu e organisacionnan, compronde miho nan mision, y participa activamente den construccion di un futuro mas amplio y fuerte pa tur Arubiano.
Comunidad completo ta invita pa bishita e Common Good Expo diahuebs awo cuminsando for di 2’or di atardi te cu 8’or di anochi y ta completamente gratis. Bin haya inspiracion, siña y forma parti di un movemento cu ta pone comunidad, respet y balornan comun central di nos sociedad.
Hunto nos por fortifica nos comunidad. Hunto nos por traha pa e bon comun.
