Diahuebs siman pasa, den e Ballroom di La Cabana, a tuma lugar e lanzamento oficial di SMARTlife, un proyecto piloto di Gecombineerde Leefstijlinterventie (GLI) cu ta enfoca riba cambio di estilo di bida sostenibel pa adulto trahador na Aruba. Ministro di Salud Publico, Mervin Wyatt-Ras, tabata presente como invitado.
E evento aki a reuni participantenan, representantenan di companianan cu ta participa, profesionalnan den sector di cuido di salud y otro invitadonan.
SMARTlife ta un proyecto financia pa ZonMw (Hulanda), bou di e programa Caribbean Health Research, cu tin como meta pa fortalece salud publico y bienestar di e islanan ABCSSS.
Durante e programa di SMARTlife, cu un duracion di 12 luna, participantenan lo haya sessionnan di lifestyle coaching y ejercicio, individual y den grupo, bou guia di fisioterapistanan cu a specialisa den lifestyle coaching. E meta ta pa desaroya custumbernan saludabel duradero riba tereno di movimiento, nutricion, drumimento y maneho di stress, cu fin di logra un mihor salud general.
E proyecto piloto aki ta wordo implementa den sector laboral, cu participacion di diferente companianan local, entre nan: La Cabana Beach Resort, Kooyman BV, Visser Pharma Group y e Departamento di Asuntonan Social di Gobierno.
SMARTlife ta e unico proyecto na Aruba cu a wordo selecciona pa ZonMw den e programa aki, y ta representa un paso importante den desaroyo di intervencionnan di prevencion y cuido di salud den e region.
Pa mas informacion tocante e proyecto SMARTlife, por bishita: https://projecten.zonmw.nl/nl/project/smartlife-gecombineerde-leefstijl-interventie
