Eduard Pieters: Gobierno no por keda den silencio: Aruba mester representacion na Hulanda y transparencia riba e asunto di Arubahuis

Durante e rueda di prensa semanal di fraccion di PPA, parlamentario Eduard Pieters a pone dos preocupacion grave riba mesa cu no por ignora mas: Aruba ainda no tin un minister plenipotenciario en Hulanda y siman pasa a suspende e directora di Arubahuis, sra. Croes, sin splicacion publico suficiente. Ta dos tema di hopi peso cu ta toca directamente e posicion di Aruba den Reino Hulandes y specificamente e manera con gobierno ta maneha proceso y nos propio profesionalnan.

Un suspension sin claridad
E suspension repentino di e directora di Arubahuis a sorprende fraccion di PPA. Sin drenta den contenido di e caso, cu incluso ta den investigacion, ta preocupante e forma cu gobierno y e minister en cuestion a actua. “No a presenta informacion concreto na Parlamento, no tin claridad publico y segun informacion disponibel, no a sigui e principio basico di ‘hoor en wederhoor’”, Eduard a elabora.
Esaki ta crea un precedente peligroso. Segun Pieters: “Nos ta papia di un profesional cu a ocupa funcionnan clave pa pais Aruba, no di un nombracion reciente. Suspende un funcionario den silencio, cu restriccion total di acceso y autoridad, sin un proceso cla, ta lanta hopi pregunta serio riba trato di nos propio profesionalnan y respet pa debido proceso”.

Mas ainda, e silencio hermetico cu a sigui no ta aceptabel. Transparencia no ta un luho; ta un rekesito di bon gobernacion, specialmente ora Aruba no tin liderazgo cla na su representacion den exterior.

Minister Plenipotenciario: no ta un deseo, sino un obligacion
“Tin hende ta puntra pakico PPA ta insisti riba nombracion di un Minister Plenipotenciario. E contesta ta simpel: no ta un deseo di PPA; ta un obligacion constitucional. Statuto di Reino Hulandes (art. 7–10) ta regla cu cada pais autonomo, Aruba, Corsou y Sint Maarten den Reino Hulandes, mester tin un Minister Plenipotenciario pa participa den Rijksministerraad, inclusivo cu derecho di voto,” Eduard a vocifera.

Den practica, e ausencia aki ta costa Aruba influencia, informacion y bos den e decisionnan di sumo importancia. Den diplomacia, presencia fisico y representacion digno no ta opcional. Aruba mester ta representa na Den Haag, pa defende su interes y contribui activamente na e decisionnan di Reino.

Arubahuis sin direccion y un pais autonomo sin bos
Segun Pieters, actualmente, Aruba no tin ni un Minister Plenipotenciario ni un director activo di Arubahuis, un institucion clave pa coordinacion, diplomacia y representacion. Esaki ta un bashi institucional cu no por sigui mas. Ademas, cu un caso legal inminente, e pregunta ta legitimo: ken lo asumi e costonan? Lamentablemente, ta e ciudadano via belasting.

Finalmente PPA no ta pidiendo favoritismo ni proteccion politico. “Nos ta pidiendo claridad, proceso corecto y liderazgo. E investigacion mester sigui su curso, pero gobierno mester duna informacion y asumi responsabilidad. Despues di casi un aña, ta ora pa nombra un minister plenipotenciario y restaura direccion na Arubahuis. Orguyo di partido y ego personal mester keda un banda. Aruba ta un solo pais, un solo bandera y merece representacion fuerte, transparente y digno,” Eduard Pieters a finalisa bisando.