Durante e conferencia di E Bon Comun diabierna, a firma otro MoU dunando realse na e movemento pa e bon comun. Esaki ta fortifica cooperacion den barionan y desaroyo cu cuido pa naturalesa
Durante e momento significativo di firmamento, como parti di e Common Good Conference, den presencia di Prome Mnister Mike Eman y Minister di Turismo Wendrick Cicilia, Natasha Silva di Aruba Conservation Foundation y Ronella Croes di Aruba Tourism Authority, a firma un Memorandum of Understanding (MoU) pa continua y fortifica e cooperacion den nos barionan.
E MoU aki ta forma parti di e esfuerso continuo di Aruba pa reforsa colaboracion den comunidad, cu un enfoke cla riba desaroyo inclusivo cu ta tene cuenta cu naturalesa. E acuerdo ta confirma e compromiso comparti pa traha hunto na beneficio di barionan, turismo y medio ambiente.
Cu e firmamento aki, e colaboracion entre e partnernan principal ta formalisa, locual ta crea un cuadro solido pa alinea desaroyo di turismo cu cuido y proteccion di nos naturalesa. Esaki ta un paso concreto pa garantisa cu progreso economico y responsabilidad ambiental ta cana hunto.
E acuerdo ta subraya e vision comparti cu un Aruba prospero ta uno cu su comunidadnan ta fuerte, su naturalesa ta protegi y su desaroyo ta basa riba respet, cooperacion y e bon comun.
