No tin ningun clase di droga cu hende por usa cu no ta haci danjo fisico y cerebral.
Hopi remedi ta contene droga , pero ta conoci pa nos tur , cu uso di marihuana, cocaina, base, piedra,opium, hash, y tur otro tipo y por ultimo esun cu ta mata casi mesora fentanyl tur ta destructivo
pa bida di hende.
Ta un plaga y un enganjo, pasobra ora bo cuminsa bo ta contento, pero ora efecto baha, bo tin cu bolbe usa di nobo, pa asina bo keda bao di efecto di droga.
Locual bo usa awe ta traha sufrimento pa bo curpa mayan, sea fisico of mental.
Pulmon ta keda na werki, nier ta danja, stoma ta wordo afecta seriamente, y mente ta bay off.
No por carga ningun clase di responsabilidad, asina ta cu usando droga poco, poco un persona ta saca su mes for di sociedad.
E ta maldad cu hende mes ta cumpra pasobra droga no ta gratis, e tin su preis, depende e temporada, depende e pais y e castigo cu ta wordo duna pa uso y benta di droga.
Imagina bo cu bo mes ta cumpra dolor di cabes pa bo curpa, pa un rato supuestamente contento, pero despues malesa ta drenta y plezier ta caba.
Un hende cu sano huicio ta mira clara mente cu droga y diabel tin un combinacion cu otro pasobra tur dos ta hinca bo den un bida di mentira cual ta dificil pa sali.
Y awor ciencia ta yama uso adiccion un malesa, pero no laga nos lubida cu no tin malesa cu Dios no por cura, y a keda proba cu un bida entrega seriamente na Cristo tin dominio riba droga.
Hopi ta esnan cu ta bisa cu nan ta adicto, pero nan ta un duele- adicto , ya cu tin situacion den nan bida cu nan no por a supera, un matrimonio kibra, perdida di un ser keri, un enganjo den trabao, un acccidente cu trauma, y hasta tin hende cu ta usa droga pa nan keda iresponsabel y asina no cumpli cu nan debernan.
Droga ta sushi,
E ta rebaha hende,
E ta kita integridad,
E ta haci hende sensual,
E ta pone hende perde berguensa,
E ta pone hende perde balor moral,
E ta pone hende risca nan bida,
Y mas cruel ainda e ta pone hende perde escrupulo, y ta pone hende comete crimen.
Den e mundo di droga, un debe di droga ta wordo paga cu bo propio bida, of bida di un ser keri, pa asina bo keda corda cu bo a faya den baho mundo di droga.
E mundo di droga ta cruel, sin curason, maniatico, perverso, vengativo, sin curason, y nos tin cu corda cu maldad no ta paga.
Hobennan ta purba y keda pega, y ,hasta tin adulto mayor cu te ainda, ta kere cu nan mester ta meti den mundo di droga.
E situacion ta hopi tristo, e risico ta hopi grandi, e enganjo ta desastroso, y te ainda tin hende ta usa droga y kere cu nan por caba cu droga, mescos cu tin ta kere cu nan por caba cu alcohol.
Droga no ta chansa, mescos cu diabel no ta chansa, e a bin solamente pa horta ,mata y destrui. ( Juan 10:10).
Si bo ta usa droga scondi , ta bo mes bo ta ganja pasobra bo resultado lo wordo mira publicamente,pasobra droga no ta respeta ningun hende.
Cuanto no a perde cas, matrimonio, bon trabao, posicion, pa motibo di droga.
Droga ta un mentira baho, y ta destrui hende.
Sinceramente, Pastor Marcel Balootje
