Fiesta ta temporal, paranda ta temporal, bebemento ta temporal, pero a yega tempo pa nos busca cosnan cu ta eterno, y tur esey nos ta hanje den Cristo Hesus.
Pasobra den dj’E henter e plenitud di e Deidad ta biba corporalmente,y den dj’E boso a wordo haci completo.
E ta e cabes riba tur gobierno y autoridad.( Colosensenan 2:9-10).
Ta tempo pa tur hende reconoce Cristo Hesus como nos Senjor y Salbador , pasobra no tin otro caminda, tur otro caminda ta caminda di scuridad, caminda di mentira,caminda di inmoralidad, pasobra E ta e caminda di berdad y e bida.
Pa motibo cu hende ta scohe robes, of keda sin scohe, of ninga di scohe, y mas fuerte ainda, ta esnan cu ta haci manera nan ta scohe pa Cristo Hesus , pero nan curason leu for di dj”E, cosnan no ta cana bon.
No ta importa den ki situacion bo por hanja bo aden, no laga ningun hende ganja bo y bisa cu Dios no ta pordona bo cu Dios no por yuda bo, Cristo Hesus mes a bisa : Bin serca Mi tur cu ta cansa y carga y lo Mi duna boso sosiego.( Mateo 11:28).
Cristo Hesus no ta hende cu ta priminti un cos y despues no ta cumpli pasobra tur cos ta na su alcanse, y e ta donjo di tur cos.
Pesey tur rudia mester dobla y tur lenga mester confesa cu Cristo Hesus ta Senjor pa Gloria di Dios Tata.
E lugar cu Cristo Hesus tin den nos bida e no por wordo reemplaza , ni tampoco negocia, e no tin temporada halto y temporda abao , e ta nos Salbador y pa medio di dj’E nos tin bida eterna.
Awor bida eterna por wordo ricibi solamente pa medio di Cristo Hesus, pasobra Dios Tata a bisa cu tur esnan cu kere den Su Yiu unigenito lo tin bida eterna , esnan cu no kere ta condena caba.
Hesus a bisa nan: Ami ta e pan di bida, esun cu bini serca Mi lo no hanja hamber, y esun cu kere den Mi lo no hanja set nunca.( Juan 6:35).
Ami ta e lus di mundu, esun cu sigi Mi lo no cana den scuridad, ma lo tin e lus di bida.( Juan 8;12).
Cristo Hesus ta nos Salbador, nos Redentor, nos Sanador, nos Libertador, Esun cu a muri pa nos picanan riba sero di Calvario, y Esun cu ta bin busca su pueblo pronto.
Den Cristo Hesus nos tin tur cos, pesey nos por bisa cu tur cos nos por den Cristo cu ta fortalese nos, y tambe nos por bisa cu nada por separa nos for di e amor di Cristo Hesus, y tambe nos por bisa cu si Dios ta cu nos ken por ta contra nos?
Pesey laga nos pone tur duda un banda y corre cu confiansa bay na Su trono di gracia, pa nos por hanja ayudo y pronto auxilio.
David a bisa den Salmo 121:2 Mi yudansa ta bini for di Senjor kede a traha cielo y tera.
No tin condenacion pa esnan cu ta den Cristo Hesus. ( Romanonan 8:1)
Y nos sa cu Dios lo haci tur cos lo obra huntu pa bon, pa esnan cu ta stima Dios, pa esnan cu ta yama segun Su proposito.( Romanonan 8:28).
E bashi cu ta den nos curason , cu hopi biaha nos ta purba yene cu cosnan temporal,ta e lugar cu Cristo Hesus mester ocupa den nos bida, pa nos bida ta yena cu berdad,y ta completo.
Sinceramente, Pastor Marcel Balootje
