Riba 1 di februari 1996 a pone e fundeshi pa loke awe nos conoce como Wardacosta di Caribe Hulandes. Wardacosta ta un partner importante den siguridad maritimo y ta un organisacion profesional y respeta local y internacional. Loke a cuminsa como un partnership simpel entre polis di haf, milicia y Defensa Antiano, cu un oficina den algun portocabins y un barak sirbiendo como e Centro di Rescate y Coordinacion (RCC), a crece den trinta aña bira un organisacion madura cu ta vigila e costanan maritimo 24 ora pa dia, 7 dia pa siman.
Den e prome añanan, e forsa laboral tabata consisti di mas of menos 80% personal di defensa y 20% personal local. Esaki awo a cambia completamente. Awendia, mas of menos 80% di e personal di Wardacosta ta local. E desaroyo aki ta enfatisa e raisnan local fuerte y e crecemento di e organisacion.
Wardacosta a pasa pa un desaroyo rapido for di cuminsamento. E prome cutternan a wordo poni den uzo na 1999, cuminsando cu Jaguar na Corsou, sigui pa Panter na Aruba y Poema na Sint Maarten. Ademas di botonan di patruya y botonan di costa, e flota a modernisa durante añanan cu e introduccion di Super RHIBs y mas despues Metal Shark. Tambe a desaroya capacidad aereo, cu e avionnan di Wardacosta y helicopternan, cualnan ta ser sosteni p’e punto di sosten di Hato y un sistema di radar extenso.
Formacion y profesionalismo semper a bira balornan central den Wardacosta. For di e prome estudio cual ta e ‘Initiele Kustwacht Opleiding’ (IKO) na 1998, cu a sigui desaroya bira e ‘Junior Bemanningslid Kustwacht’ (JBK) na 2024, cu ta percura pa e hoben ricibi un diploma SBO-2.
Cu e transicion pa un organisacion totalmente basa riba informacion 24/7, planea pa e cuminsamento di 2026 y cu un crecemento pa aproximadamente 320 posicion di formacion, Wardacosta ta mira e futuro cu confiansa. E celebracion di su 30 aniversario no solamente ta un momento pa mira bek, pero riba tur cos ta un paso fuerte pa dilanti.
E 30 aniversario di Wardacosta a wordo celebra conhuntamente cu recepcionnan di aniversario na Corsou, Aruba y Sint Maarten. E celebracion aki a simbolisa e cooperacion estrecho entre e tres paisnan cual desde nan establecimento na 1996 tin un colaboracion cu a forma Wardacosta den un partner fuerte di seguridad den Caribe.
